655 Бардыгы /

БИШКЕК. Президент Сооронбай Жээнбеков Орусия Президентинин Эл аралык маданий кызматташтык боюнча атайын өкүлү Михаил Швыдкой менен жолугушту.

Адегенде мамлекет башчысы Сооронбай Жээнбеков Михаил Швыдкойду жылуу кабыл алып, үстүбүздөгү жыл Кыргызстан жана Орусиянын ортосундагы сүйлөшүүлөрдүн жогорку динамикасы жана интенсивдүүлүгү  менен мүнөздөлгөндүгүн канааттануу менен белгиледи.

– 2019-жылдын март айындагы Орусия Федерациясынын Президенти Владимир Путиндин Кыргыз Республикасына жасаган биринчи мамлекеттик сапары тарыхый достук жана ишенимдин бекем салттарында негизделген стратегиялык өнөктөштүктүн жогорку деңгээлин бекем айгинеледи. 2020-жылды Кыргызстан менен Орусиянын Кайчылаш жылы деп жарыялоо чечимибиз мунун айкын далили болуп саналат.Сиздин сапарыңыз дал ушул окуяга арналып жатат, —деп баса белгиледи Сооронбай Жээнбеков.

Сооронбай Жээнбеков бул жолугушуу Кайчылаш жылды өткөрүү боюнча кийинки кадамдарды аныктоого мүмкүндүк берип, орусиялык кесиптештери менен туруктуу жолугушуулар өлкөлөр ортосундагы стратегиялык өнөктөштүктү жана союздаштыкты жаңы жана сапаттуу деңгээлге көтөрөөрүн баса белгиледи.

– Бизге бардык тармактарда эки тараптуу кызматташтыкты өнүктүрүү абдан маанилүү. Бул биздин мамилелерди мындан ары дагы тереңдетет. 2020-жылды Кыргызстан жана Орусиянын Кайчылаш жылы деп жарыялоо Улуу Ата Мекендик согуштагы Жеңиштин 75 жылдыгын белгилөө алдында символикалуу мааниге ээ! —деп белгиледи Орусия Президентинин Эл аралык маданий кызматташтык боюнча атайын өкүлү Михаил Швыдкой жана жылуу кабыл алуусу үчүн терең ыраазычылыгын дагы билдирди.

Михаил Швыдкой Орусия тарап Кайчылаш жылдын алкагындагы иш-чараларды ийгиликтүү өткөрүүгө максаткойгондугун дагы жашырган жок.

– Ушул жыл биздин кызматташтыктын бардык тармактарын камтыганы абдан маанилүү! —деп баса белгиледи Михаил Швыдкой.

Эске салчу жагдай: 2019-жылдын 28-мартында Орусиянын Президенти Владимир Путиндин Кыргызстанга жасаган мамлекеттик сапарынын алкагында эки мамлекет башчылары тарабынан 2020-жылды Кыргыз Республикасында Орусия Федерациясынын жана Орусия Федерациясында Кыргыз Республикасынын Кайчылаш жылы деп жарыялоо чечими кабыл алынган.

Алишер ТОКСОНБАЕВ, өз кабарчы