1,440 Бардыгы /

ЖАЛАЛ-АБАД. Базар-Коргон районунун Кызыл-Үңкүр айыл аймагында заманбап жаңы мектеп ачылды.

Ачылуу аземине ЖК депутаты, вице-спикер Мирлан Бакиров, вице-премьер министр Алтынай Өмүрбекова, Өкмөттүн Жалал-Абад областындагы өкүлүнүн орун басары Ы.Ызабеков, Базар-Коргон районунун акими Айбек Бегимкулов жергиликтүү жетекчилер жана тургундар катышты.

Жаңы ачылган “Алтын-Кыя” мектеби 2015-жылы республикалык бюджеттин эсебинен курулуп башталган. Жалпы сметалык баасы 45 млн. сом болсо, тендердик баасы 37 млн сомду түзөт. Аталган мектеп 225 окуучуга ылайыкташып, эки кабат болуп курулган. Мектеп директору Бермет Тажибаеванын айтымында №21 С.Ташиев мектебинен 358 окуучу жаңы мектепке бөлүнгөн. Аларга 23 мугалим билим берүүдө.

“5141 тургун жашаган Кызыл-Үңкүр айыл аймагында бир эле №21 С.Ташиев  мектеби бар болчу. Алыста жайгашкан окуучулар кышында мектепке бара албай кыйналышат болчу. Буга чейин 960 окуучу билим алган С.Ташиев мектебинен 358 окуучу биздин мектепке өттү. Мектеп 9 жылдык болуп, бүт шарттары менен заманбап болуп курулду” – дейт Б.Тажибаева.

Кошумчалай кетсек, Базар-Коргон району боюнча 65 мектеп болсо, Бүткүл дүйнөлүк банкы тарабынан эмдиги жылы 2 мектеп курулуп баштайт. Ал эми район боюнча 7 мектеп авариялык абалда турат.

Бүбүсара ОРОЗАЛИЕВА, “Аймак”