1,369 Бардыгы /

ЖАЛАЛ-АБАД. Бүгүн, 20-ноябрь күнү Б.Осмонов атындагы Жалал-Абад мамлекеттик университетинде Кыргыз Республикасынын эл баатыры, коомдук жана саясий ишмер, калкка кадыры сиңген улуу инсан Дооронбек Садырбаевдин 80 жылдыгына арналган илимий конференция болуп өттү.

Ага облустардан атайын чакырылган өкүлдөр жана аталган окуу-жайдын ректору Кеңешбек Усенов, ошондой эле  окутуучулук курамы катышышты.

Аталган конференцияда кыргыз элинин тарыхын, үмүтүн тилге келтирген инсандын, басып өткөн жолун, анын адамгерчилигин, саясаттагы ордун, айтканынан кайтпаган инсандын өмүр таржымалы жана жасаган иштери айтылды.

Конференцияда ЖАМУнун энергетика жана механика кафедрасынын башчысы, техника илимдеринин доктору, профессор Абдумаматкадыр Аширалиев бул тууралуу төмөнкүлөргө токтолду:

-Атактуу Аалы Токомбаев айткандай, “Өмүр бизден өтүп кетсе, эл эмгектен эскерсин”- деген учкул сөзү Дооронбек Садырбаевге тиешелүү деп эсептейм. Анткени бул кишинин эмгектери узак убакытка сабак боло турган тарбиялык мааниси да арбын эмгектерди таштап кетти. 80 жылдык маарекесине арналган конференцияларды уюштуруп жаткан, демилге көтөргөн инсандарга ыраазычылык билдиришибиз керек. Дооронбек акенин эмгектерин санап отуруу кыйын, эмгектери айрыкча жаштар үчүн өрнөк болушу керек. Өзүнүн ишине чыгармачылык менен мамиле кылган, кыргыз дегенде күйүп-жанып эмгектенген. Кандай кырдаал болбосун ачыктыкты, акыйкатты айткан инсандын асыл сапаттарын баса белгилегим келет. Ким болбосун өзүнүн оюн ачык айткан. Саясатта өзүнүн орду чоң эрктүү инсан болгон. Башкалар айта албаган чындыкты айтып, ишине ак дили менен берилген инсан эле.

Белгилей кетсек, Дооронбек Садырбаев 70тен ашуун даректүү тасмалардын, “Арман”, “Махабат дастаны”, “Эне бөрүнүн ыйы” өңдүү 16 көркөм тасманын автору. Анын 8 көркөм жыйнагы жана 700дөн ашык публицистикалык макалалары жарык көргөн.

“Аймак”