1,071 Бардыгы /

ЖАЛАЛ-АБАД. Үстүбүздөгү жылдын 10 айдагы жыйынтыгында республика боюнча ВИЧ илдети менен 8994 адам катталган. Бул маалымат Жалал-Абаддагы журналисттер катышкан тегерек столдо айтылды.

Жалал-Абаддагы СПИД борборунун адисинин маалыматына ылайык өлкө боюнча 10 айда 8994 адам ВИЧ/СПИД илдети менен каттоого турган. Анын 5758и эркектер, калган 3236сы аялдар болгон. Ал эми Жалал-Абад областы боюнча 10 айда  аталган илдет менен 1044 адам катталган.

Алардын 0-17 жашка чейин 10%, 18-29 жашка чейин 33%,30-49 жашка чейин 50%, 50 жаштан кийинкилерде 7% катталган.

Адистердин айтымында бул илдет 3 жол менен негизи кан аркылуу жугат. Корголбогон жыныстык катнаш, илдет менен ооруган энеден баласына төрөт учурунда жана эмизген учурда, тазаланбаган медициналык аспаптарды колдонуу аркылуу илдетти жуктуруп алуу коркунучу бар.

Илдеттен этият болууну жана ден соолукка кайдыгер карабоону дарыгерлер эскертип келишет. Алдын алуу аракетин жүргүзүп, райондорго мобилдик клиника менен барып калкты текшерүүдөн өткөрүшөт.

Эскерте кетсек, СПИД алгачкы жолу өлкөбүздө 1996-жылы катталып, андан бери илдеттен жабыркагандар бар.

Акылай КАРАБАЕВА, “Аймак”