Аймак

ЖАЛАЛ-АБАД: ЫКЧАМ МЕДИЦИНАЛЫК ЖАРДАМ КӨРСӨТҮҮ БОРБОРУ АЧЫЛУУ АЛДЫНДА ТУРАТ

ЖАЛАЛ-АБАД: ЫКЧАМ МЕДИЦИНАЛЫК ЖАРДАМ КӨРСӨТҮҮ БОРБОРУ АЧЫЛУУ АЛДЫНДА ТУРАТ

 2,539 Бардыгы /

Жалал-Абад облустук клиникалык ооруканасында кийинки айдан тартып ыкчам медициналык жардам көрсөтүү бөлүмү иштеп баштайт. Анын курулуш иштери менен 2-декабрда өкмөттүн облустагы ыйгарым укуктуу өкүлү Кыянбек Сатыбалдиев таанышып чыкты.

Январь айында ишке берилгени жаткан борбордун ачылышына президент да катышары айтылып жатат. Оорукананын директору Кумарбек Ботокараев билдиргендей, бөлүм ишке берилери менен бейтаптарды кабыл алуу, тез жардам көрсөтүү жана ооруканага жайгаштыруу да ушул жерде жүргүзүлө баштайт.

– Эки кабаттуу имарат толугу менен заманбап медициналык жабдуу менен камсыздалып, дарыгерлер да окутуудан өтүп жатат. 8 керебет жайгашып, эки операция бөлмөлөрү орун алган. Бул Кыргызстанда алгач ирет ачылып жаткан бөлүм болуп, учурда курулуштун 97%ы аяктап калды. Ишке берилген соң бир суткада алтымыштай бейтапты кабыл алып тийешелүү бөлүмдөргө жайгаштырат – деди Ботокараев.

Ал эми оорукананын айлана чөйрөсү, тротуарлары эскирип басууга ыңгайсыздык жаралып келген. Акыркы 2-3 жылда жакшыртуу иштери жүрүп, учурда айланадагы тосмолор, тротуарлар асфальтталып, арча көчөттөр эгилген.
Оорукананын бүгүнкү абалы жана курулуштар менен таанышкан облус жетекчи, Жалал-Абадда медициналык тейлөө бир топ жакшырып жатканын билдирди.

Германия өнүктүрүү банкынын каржылоосундагы бейтапкананын курулушу 2017-жылдын май айында башталган. 1,7 млн евро курулушка жана 1,3 млн евро имаратка медициналык жабдыктарды сатып алууга жумшалган.

Облустук оорукана жыл сайын 27 миңден ашык бейтапты тейлейт. 575 орунга ылайыкталган бейтапканада былтыр Кувейт өлкөсүнүн «Ассалам» фондунун каржылоосу менен 29 млн. сомго курулган күйүк бөлүмү да ачылган.

 

Ошондой эле областтык клиникада кулак-мурун, көз ооруларын дарылоо, урология жана гистологиялык ткандарды изилдөө лабораториясын камтыган 100 койка менен камсыздалуучу жаңы имарат курулуп жатат. Курулуш, капиталдык салымдардын каржылоосунда 77 млн 350 миң каражат менен камсыздалууда. Аяктоо иши 2020-жылдын күз айларына божомолдонууда.

“Аймак”

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17