703 Бардыгы /

2-декабрда Идлиб провинциясында Сирия жана Орусия авиациясынын соккуларынан кеминде 15 жай тургун мерт болду. Бул тууралуу Сириядагы адам укуктарынын сакталышына байкоо жүргүзгөн борбор билдирди.

Баш кеңсеси Улуу Британияда жайгашкан уюмдун маалыматына караганда, Идлиб провинциясындагы Маарет аль-Нуман шаарынын базарын аткылоо учурунда 13 адам каза болуп, дагы 18и жаракат алган. Алардын көбүнүн абалы оор. Мындан тышкары аталган провинциянын түштүк-чыгыш бөлүгүндөгү Саракеби жана Аль-Сарман кыштактарында бирден адам мерт болду.

Уюмдун башчысы Рами Абдел Рахман орусиялык учактар Идлиб шаарынын түштүгүндө жайгашкан Кфар Сажна кыштагына да сокку урганын билдирди.

Орусия Сирияда жаңжал башталгандан бери бул өлкөнүн президенти Башар Асадга колдоо көрсөтүп келет. Түркия менен чектешкен Идлиб провинциясында негизинен сирия оппозициясынын күчтөрү топтолгон.

Ал ортодо Орусиянын Коргоо министрлиги Сириянын Түркия менен чектешкен аймагын күзөтүп жүргөн аскердик полициянын үч кызматкери жаракат алганын билдирди. Болжол менен алар 2-декабрда чек арага жакын жайгашкан Кобан шаарындагы бомба жарылуусунан жабыркашкан.

Орусия менен Түркия күчтөрү президенттер Владимир Путин менен Режеп Эрдоган кол койгон макулдашуунун алкагында ноябрдан бери аталган аймакты биргелешип күзөтүп келишет.

www.