943 Бардыгы /

Тажикстандын Улуттук банкы акча которуу боюнча процессинг борбору ишке киргенден кийин техникалык маселелер жаралганын, учурда алешемдиктер жоюлуп, акча жөнөтүү жараяны өз нугуна түшкөнүн билдирди.

Маалыматка караганда, “Амонатбанктын” аймактардагы айрым бөлүмдөрү гана борборго али туташып үлгүрө элек.

Учурда “Юнистрим” жана “Контакт” төлөм системалары гана Улуттук банктын процессинг борборуна кошулган. Бирок бул системалар аркылуу акча жөнөткөн мигранттар Тажикстандагы туугандары акчаны алууда кыйынчылыктарга туш болуп жатканына даттанышууда.

Орусияда иштеп жүргөн Фируза Кузиева: “Он күн мурун “Юнистрим” аркылуу акча жөнөткөм. Байкуш энем кечке банкта турат, бирок акчаны ала албай жатат”, – деди.

Бул арада социалдык түйүн колдонуучулары өлкө президентине ачык кат жолдошуп, мурдагы акча которуу системасын калыбына келтирүүнү өтүнүшүүдө.

Тажик бийлиги буга чейин акча которуу рыногунда атаандаштык жок болгонун, негизинен “Золотая корона” системасы кызмат кылып келгенин билдирүүдө. Тажикстандын Улуттук банкы бул багытта реформа жүргүзүү үчүн эки жыл даярдык көргөн.

Тажикстанда 3-декабрдан тарта улуттук акча которуу системасы иштей баштаган. Ага ылайык, эл аралык төлөм системалары Тажикстандын Улуттук банкында атайын эсеп ачып, ага бир айлык акча которуулардын суммасына тете акча которуп, операцияларын ал аркылуу ишке ашырууга милдеттендирилген.

Эл аралык иликтөөлөргө караганда, Тажикстанда ар бир төртүнчү үй-бүлө эмгек мигранттары жөнөткөн акчанын эсебинен жашайт. Быйылкы жылдын 9 айында эле Орусияда иштеген тажикстандыктар мекенине 2, 5 миллиард доллардан ашык каражат жиберишкен.

www.