961 Бардыгы /

БИШКЕК. Президент Сооронбай Жээнбеков чекарадагы акыбал боюнча атайын кеңешме өткөрдү.Анда мамлекет башчысына чек арада чыр-чатактардын алдын алуу, анын ичинде Баткен облусунун Кыргыз-Тажик бөлүгүндөгү мамлекеттик чекаранын коопсуздугун туруктуу камсыз  кылуу боюнча чаралар  туурасында маалымат берилди.

Президент Сооронбай Жээнбеков коңшу өлкөлөр менен чекара кызматташтыгын мындан ары өнүктүрүүнү ого бетер күчөтүү, чек арага жакын жайгашкан райондордун тургундарынын толук кандуу коопсуз жашоо-тиричилигин камсыз кылуу зарылдыгын баса белгиледи. Кечээ жакында эле Тажикстандын Президенти Эмомали Рахмон менен телефон аркылуу сүйлөшүүсүндө эки өлкөнүн Чекарасындагы туруктуу абалды биргелешип сактоого умтулуу аракеттери белгиленгенин дагы бир ирет эскертти. Ошондой эле эки жакта тең чагымчыл аракеттерди болтурбоо үчүн чекарадагы чыр-чатактардын алдын алуу боюнча профилактикалык иштер Тажик тарап менен тыгыз байланышта жүргүзүлүшү зарылдыгын дагы эскертти. Ошондой эле чек ара аймактарында мындай окуяларды мындан ары таптакыр болтурбоо үчүн жергиликтүү калктын арасында түшүндүрүү иштерин ого бетер күчөтүп, профилактикалык чараларды кабыл алуу зарылдыгы актуалдуу экендигин ачык моюндады.

Вице-премьер-министр Жеңиш Разаков тажик тарап менен чекарадагы абал боюнча сүйлөшүүлөрдү жүргүзүүгө өзү баштаган Кыргыз Республикасынын делегациясы даяр экендигин билдирди. Жолугушуу чекара аймагында өтө тургандыгын кошумчалады.

Аталган кеңешмеге Кыргыз Куралдуу күчтөрүнүн Башкы штабынын жетекчиси Райымберди Дүйшөмбиев, вице-премьер-министр Жеңиш Разаков, Президенттин Аппаратынын жетекчисинин орун басары Алмамбет Салиев, Коопсуздук Кеңешинин катчысы Дамир Сагынбаев, Башкы прокурор Өткүрбек Жамшитов, ички иштер министри Кашкар Жунушалиев, тышкы иштер министри Чыңгыз Айдарбеков, Улуттук коопсуздук мамлекеттик комитетинин төрагасы Орозбек Опумбаев жана Мамлекеттик чекара кызматынын төрагасы Уларбек Шаршеев катышышты.

Алишер ТОКСОНБАЕВ, өз кабарчы