1,070 Бардыгы /

БИШКЕК. Президент Сооронбай Жээнбеков 2017-жылдын 16-январында Чүй облусунун Сокулук районундагы Дача-Су айылында учактын кыйрашынын кесепетинен өз жакындарын жоготкон балдар менен салттуу  түрдө жолугушту.

Мамлекет башчысы Дача-Су айылында «Боинг-747» жүк ташуучу учактын кыйрашынын кесепетинен ондогон жарандардын, булардын арасында жаш балдардын курман болушу бүтүндөй Кыргыз эли үчүн трагедиялуу окуя болгондугун терең кайгыруу менен белгиледи. Адамдардын курмандыгына байланыштуу дагы бир жолу көңүл айтып, бул алардын жакындары жана туугандары үчүн гана эмес, бардык кыргызстандыктар үчүн орду толгус жоготуу экендигин жашырган жок. Ошондуктан, тиешелүү мамлекеттик органдар жана жергиликтүү бийлик тарабынан алардын ар кандай социалдык-тиричилик маселелерин чечүүгө дайыма куөңүл бурулуп тураарына катуу ишендирди. Мындан тышкары авиакырсыктын кесепетинен өздөрүнүн жакындарын жоготкон балдарга бекем ден соолук, узун өмүр жана бакубат жашоо тиледи. Ал эми курман болгондордун жакындары жана туугандары өлкө жогорку жетекчилиги тарабынан көңүл бурулуп, үзгүлтүксүз колдоо көрсөтүлүп жаткандыгы үчүн мамлекет башчысына терең ыраазычылыгын билдиришти. Ошондой эле өздөрүнүн жашоо-тиричилигиндеги маселелери жөнүндө кеңири баян этишти.

Жолугушуу соңунда Президент Сооронбай Жээнбеков балдарга эстеликке белек катары китептерди жана электрондук планшеттерди тартуулады. Бул жолугушууга жакындарынын коштоосунда Жакшылык Шералиев, Султан Абакиров, Элайым Райымкулова, Мирлан Нурланов, Эрлан Шаршенбеков жана Сайкал Карыпбаева келишти.

Алишер ТОКСОНБАЕВ, өз кабарчы