2,275 Бардыгы /

Бүгүн 30-январда Жалал-Абадда “Жайкы паралимпиада оюндарынын мүнөздөмөсү” аттуу китептин презентациясы жана ден соолугунан мүмкүнчүлүгү чектелген спортчулардын жолугушуусу болуп өттү.

Бул жолугушууга облустук социалдык мониторинг жана өнүктүрүү бөлүмүнүн адиси Абдиллабек Камбаров, социалдык коргоо башкармалыгынын адистери, спортчулар катышты.

Анда  КРдин Эл аралык класстагы спорт чебери Адилет Камчыбеков катышып, спортчулардын өз суроолоруна жооп берип, көйгөйлөрү менен таанышты. Андан сырткары ден соолугунан мүмкүнчүлүгү чектелгендер үчүн “Жайкы паралимпиада оюндарынын мүнөздөмөсү” аттуу китептин презинтациясы болду. Аны спортчуларга тапшырып, паралимпиада тууралуу маалыматтарды берип өттү.

“Биздин коомдогу мүмкүнчүлүгү чектелген адамдарды коомго кантип аралаштырабыз, келечеги кандай болору бизди кызыктырат. Балдар, ата-энелер үйүндө олтурат, бирок аларда үмүт жок. Ошол балдар кыргыздын келечеги үчүн чет элде желекти желбиретип, биздин намысты коргогон балдар болсун дейбиз. Алар спортко аралашуунун багытын, жолдорун билбей, маалымат жок болуп жатат. Ошондуктан бул “Жайкы паралимпиада оюндарынын мүнөздөмөсү” аттуу колдонмодо мүмкүнчүлүгү чектелеген адам кандай спорттун түрү менен машыга алары көрсөтүлгөн”,-дейт А.Камчыбеков.

Ал өз сөзүндө ден соолугунан мүмкүнчүлүгү чектелген балдар деп сөз менен эле балдарды чектеп коюу туура эмес экенин, тескерисинче кайраттуу балдар деп атоо жакшы болорун белгиледи.

Ал эми окуу усулдук колдонмонун максаты, ден соолугунан мүмкүнчүлүгү чектелген жарандарды дене тарбия жана спорт аркылуу дени сак жашоого үндөө, коомдогу социалдык жана интеллектуалдык деңгээлин көтөрүү болуп саналат.

Акылай КАРАБАЕВА, “Аймак”