1,465 Бардыгы /

Казакстанда 2019-жылы даректүү социалдык жардам алган 75 миңге жакын үй-бүлө мамлекеттен кирешесин жашырган. Бул тууралуу өлкө премьер-министринин орун басары Бердибек Сапарбаев билдирди.

Анын айтымында, алар алган каражатты өз ыктыяры менен кайтарып бербесе, сот аркылуу милдеттендирилет.

— Бүгүнкү күнгө карата 500 миллион теңгеге жакын (1,3 миллион доллар) кайтарылды. Эгер мыйзамсыз каражат алган үй-бүлөлөр өз ыктыяры менен кайтарып беришсе, эч кандай маселе болбойт. Баш тартышса, сот аркылуу милдеттендиребиз, — деди Сапарбаев.

Буга чейин кээ бир көп балалуу жана муктаж үй-бүлөлөр кирешелери кайрадан текшерилгенден кийин, бийлик алардан социалдык жардам катары алган акчаны кайра талап кылып жатканын билдиришкен. Алардын айрымдары бул талапка каршы сотко кайрылган.

Былтыр февралда Нур-Султандын четинде үй өрттөнүп, беш бир тууган кыз мерт болгондон кийин көп балалуу энелер нааразылык акцияларына чыгып, бийликтен социалдык колдоону күчөтүүнү, турак жай маселесин чечип, жөлөк пулду көтөрүүнү талап кылышкан. Бул окуялардан кийин өкмөт жазында кирешеси өтө төмөн үй-бүлөлөргө бериле турган жөлөк пулдун көлөмүн 21 миң теңгеге чейин көбөйткөн.

Быйыл январдан тарта Казакстанда аз камсыз үй-бүлөлөргө жардам берүү механизминин өзгөрүлгөн варианты күчүнө кирди. Ага ылайык, өкмөт муктаж үй-бүлө мүчөлөрүн жумуш менен камсыздап, жеңилдетилген насыя жана бизнес ачуу үчүн кайтарымсыз гранттарды сунуштайт. Эгер үй-бүлөнүн жумушка жарамдуу мүчөсү бул сунуштардан баш тартса, аларга даректүү социалдык жардам берүү токтотулат. Мындан тышкары кирешесине карабастан төрттөн көп баласы бар үй-бүлөлөр үчүн кепилдендирилген социалдык пакет киргизилди. Анын алкагында мындай үй-бүлөдөгү 18 жашка толо элек ар бир бала үчүн орточо 11 миң теңгеден жөлөк пул берилет.

Бирок айрым көп балалуу энелер бул акча үй-бүлөнүн кирешеси катары эсептелгендиктен, алар даректүү социалдык жардам ала албай калып жатышканын билдирүүдө. Буга байланыштуу январда өлкөнүн бир нече шаарында даректүү социалдык жардам берүүнүн мурдагы механизмин кайтаруу талабы менен көп балалуу энелердин нааразылык акциялары өткөн.

Өлкөнүн Эмгек жана социалдык өнүктүрүү министрлиги 28-январга карата даректүү социалдык жардам алуу тууралуу 80 миңден ашык үй-бүлө арыз бергенин билдирди. Алардын 33 миңге жакынын көп балалуу үй-бүлөлөр түзөт.

www.