869 Бардыгы /

Тажикстандын Улуттук банкы «Золотая корона» акча которуу системасынын өлкөдө иштөөсүнө уруксат берилбей жатышынын себебин билдирди.

Мекеменин төрага орун басары Жамолиддин Нуралиевдин айтымында, «Золотая корона» бул системага байланышкан тобокелдиктерди өз мойнуна алууга даяр болгон банк табылганда гана Улуттук акча которуу системасына кошулат.

— «Золотая корона» аркылуу которулган акчанын өлчөмү өтө көп экенин эске алганда, ал өлкөдөгү социалдык-экономикалык абалды туруксуздаштыра турган рычагга ээ болчу. Азыр ал биз койгон талаптарга жооп бербейт. 2018-жылы Дангара районунда туристтерге кол салган топ да каражатты «Золотая корона» аркылуу алган. Тилекке каршы, ал кезде акча которуу тармагында көзөмөл азыркыдай болгон эмес, — деди Нуралиев.

Азырынча «Золотая коронанын» жетекчилиги бул билдирүү боюнча комментарий бере элек. Бирок буга чейин Тажикстандын Улуттук акча которуу системасына кошулуу үчүн коюлган талаптар Орусиянын «Улуттук төлөм системалары тууралуу» мыйзамына каршы келерин билдирген.

Тажикстанда Улуттук акча которуу системасы 2019-жылдын 3-декабрынан тарта иштей баштаган. Ага ылайык, эл аралык төлөм системалары Тажикстандын Улуттук банкында атайын эсеп ачып, операцияларын ал аркылуу ишке ашырууга милдеттендирилген. «Золотая корона» бул талапты аткаруудан баш тарткандыктан, Тажикстандагы коммерциялык банктардын бул система аркылуу келип түшкөн каражатты жарандарга төлөп берүүсүнө тыюу салынган.

www.