596 Бардыгы /

БИШКЕК. «Кыргыз Республикасынын ирригацияны өнүктүрүү боюнча Мамлекеттик программасын ишке ашыруу максатында 65 миң гектардан ашык жаңы сугат жерлер өздөштүрүлүп, дагы 50 миң гектар жерди суу менен камсыздоо жогорулайт, — деп ишендирди Президент Сооронбай Жээнбеков Чүй облусунун Ысык-Ата районунун жашоочулары менен жолугушуусунда.

Мамлекет башчысы 51 миң гектар жердин мелиоративдүүлүгү кыйла жакшырып, 9,5 миң гектар жер насостук сугаруудан өз нугу менен сугарууга өтүп, дагы кошумча 245 миң жумушчу орду түзүлөрүн кошумчалады.  Сооронбай Жээнбеков бул мамлекеттик Программа 2026-жылга чейин үч этапка бөлүнүп аткарылаарын эскертти. Биринчи жана экинчи этапта 2024-жылга чейин 31 суу-чарба обектилери ишке берилет. Аларды каржылоого 259,1 миллион доллар сарпталат. 2018-2019-жылдары республика боюнча 1364 гектар жаңы сугат жерлери өздөштүрүлүп, 3296 гектар сугат жерлерди суу менен камсыздоо жогорулаган, 3869 гектар жерлердин мелиоративдик абалы абдан жакшыртылган.

Президент Сооронбай Жээнбеков мындай кадамдар дыйкан, фермерлерге чоң жөлөк болуп, өлкөбүздүн азык-түлүк коопсуздугун толук кандуу камсыз кылаарын өзгөчө белгиледи.

Алишер ТОКСОНБАЕВ, өз кабарчы