742 Бардыгы /

БИШКЕК. «Азыркы тапта элет жеринде ишкердикти өнүктүрүү үчүн өтө жагымдуу шарттарды түздүк. Кийинки эки жылда түзүлгөн экономикалык климат аймактарды өнүктүрүү үчүн абдан түрткү берет», — деп баса белгиледи Президент Сооронбай Жээнбеков Чүй облусунун Ысык-Ата районунун жашоочулары менен жолугушуп жатып.

Мамлекет башчысы бул шарттарды пайдалануу менен өлкөбүздүн аймактарды, мунун ичинде Ысык-Ата району катуу өнүгөт деп билдирип, бул боюнча жалпы республикада болуп жаткан, аймактарды өнүктүрүүгө багытталган олуттуу иштер жөнүндө баян этти. Жагымдуу инвестициялык климат түзүү менен бизнести колдоо үчүн жасалган иштерди өзүнчө белгиледи.

– Салык жагынан колдоо боюнча абдан көп иштерди аткардык. Айыл чарба продукциясын кайра иштеткен ишканалар үчүн кошумча нарк салыгы 80 пайызга кыскартылды. Айыл чарба кооперативдери, соода-логистикалык борборлору, машина-трактордук станциялары үчүн мүлк салыгы 50 пайызга азайтылды. Ал эми пайдага болгон салыктан булар таптакыр бошотулду, — деди Сооронбай Жээнбеков.

Мындан тышкары, айылдарда ачылган жаңы өндүрүш ишканалары беш жылга салыктын төрт түрүнөн (киреше, пайда, жер, мүлк салыктарынан) бошотулган.

Жеңил өнөр жай тармагындагы элүүдөн ашык кызматкерлери бар ишканалар үчүн киреше салыгы дээрлик азайтылган.

– Бул жердеги ар бир кызматкер орточо эсеп менен мурдагы 1500 сомдун ордуна — азыр орточо алганда 400 сомдон төлөшөт. Ушул эле ишканалар үчүн социалдык төлөмдөр 27 пайыздан 12 пайызга азайтылды, — деп кошумчалады Мамлекет башчысы Сооронбай Жээнбеков.

Анткени, буларга тишелүү мыйзам үстүбүздөгү жылдын январь айынын ортосунда күчүнө кирген.

Алишер ТОКСОНБАЕВ, өз кабарчы