1,487 Бардыгы /

Бүгүн, 7-февралда Өкмөттүн Жалал-Абаддагы өкүлчүлүгүндө КРдин айыл чарба, тамак-аш, өнөр-жай жана мелиорация министри Эркинбек Чодуев фермер-дыйкандар менен жолугушту.

Жыйынга Өкмөттүн Жалал-Абаддагы ыйгарым укуктуу өкүлү Нурболот Мирзахмедов жана тиешелүү адистер жана фермер-дыйкандар катышты. Андан сырткары министр менен кошо көйгөйлөр менен жеринде чечүү максатында тийиштүү департаменттин жетекчилери да келген.

Жыйында жазгы талаа иштерине даярдыктардын учурудагы абалы менен таанышуу, минералдык жер семирткичтер менен камсыздоо, ички чарба аралык каналдардын, айыл чарба техникаларынын даярдыгы жана үрөнчүлүк, кооперативдерди өнүктүрүүгө шарттарды түзүү тууралуу көйгөйлөр айтылды.

“Жазгы талаа иштерин уюшкандыкта өткөрүү максатында биз түштүктүн үч областына сапар менен келгенбиз. Кечээ, Баткенде фермер-дыйкандар менен жолугуп бир топ маселелерди жеринде чечкенге аракет кылдык. Кээ бир маселерди жазып алдык, барып өкмөт жана каржы министрлиги аркылуу сүйлөшүп маселелерди чечүүгө аракеттерди жасайбыз”- дейт Э.Чодуев.

Министрдин айтымында жазгы талаа иштерин уюштурууда төрт чоң маселе болсо, анын биринчиси үрөнчүлүк болууда. Андан башка күйүүчү-майлоочу майлар, айыл-чарба техникаларынын жазгы талаа жумуштарына даярдыгы жана жер семирткичтер боюнча камсыздоо маселелери болуп саналат.

2018-жылга караганда 2019-жылы айыл-чарба тармагынын өсүү темпи 2,6%га жогорулаган. Анын ичинен Жалал-Абад областы өсүү темпин 2,8%га көтөрө алган.

Акылай КАРАБАЕВА, “Аймак”