3,009 Бардыгы /

Китеп – бизди дүйнө таанууга, адептүүлүккө, ыймандуулукка тарбиялайт. Биз китепти окуганда китептеги ар бир чыгарманын каарманына айланып, алардын башынан өткөргөндөрүн биз да ошол кезде башыбыздан өткөрүп, элестетип ошол чыгарманын ичинде бир аз болсо да жашап тарбия алабыз.

Инсан үчүн реал турмуштагы кыйынчылыктарды оңой жеңүү үчүн, биз окуп жаткан китептеги чыгармалар өтө чоң мааниге ээ.

Белгилей кетсек, китептин атаандаштары болбосо керек. Аларда адамзаттын билими, маданияты камтылган. Алар адамгерчиликке, курчап турган чөйрөнүн кооздугун ачып көрсөтөт, жашоону сүйүүгө, таанып билүү рахатына үйрөтөт. Ошондой эле китеп маданияты чөйрөсүндө терс факторлор далилденбейт. Айрыкча билим алуу зарылдыгын шарттайт.

Китепти көп окуган инсан эч качан кем болбойт.

Бирок, азыркы учурда көчөдө китеп көтөрүп бараткан адамды учуратышың кыйын. Себеби китеп ордуна планшет, телефон, компьютерлерди пайдаланып, инсандар бардык суроолорунун жоопторун интернеттен издеп калышты.

Албетте, бул маселе биздин өлкөбүздө гана эмес, бүтүн жер жүзүндөгү көйгөйлүү маселе болуп калды. Бүгүнкү күндө китептердин ордун телекөрсөтүүлөр, компьютердик, телефондогу оюндар сүрүп чыгып жатканы талашсыз. Анткен менен компьютердик оюндарда олуттуу коркунучтар бар жана баланын ден соолугуна гана эмес, психикалык өнүгүүсүнө дагы өтө оор, кайгылуу кесепеттерди алып келүүсү мүмкүн.

Мен өзбек тилдүү мектепте кыргыз тил жана адабият сабагынан мугалим болуп иштейм. Балдарды китеп окууга кызыктыруу үчүн мектепте адабият сабагынан окуткан мугалимдерге чоң милдеттер жүктөлгөн. Бул максатта мен окуучуларымды китеп окууга кызыктыруунун жаңы ыкмаларын пайдалануу менен китептеги окуяларды өз турмушубузга байланыштырып, көркөм окутуп, же ошол каармандарды балдарга аткартуу менен китеп окууга кызыктырам. Мурдагы жылдарга караганда учурда китеп окууга кызыккан балдардын саны арбып баратканы байкалат. Китеп окуган баланын кулк-мүнөзү, мамилеси, дүйнөгө болгон көз карашы, маданияттуулугу, мээримдүүлүгү байкалат.

Душмандар дайыма окумуштуулардан коркушкан. Себеби аларды жеңиш жана башкарыш кыйын болушун түшүнүшкөн. Ошондуктан, ата-энелерди балдарыбызды китеп окуганга үйрөтөлү, жаштайынан жомокторду окуп берүү менен кызыктыралы деп айткым келет.

Пайгамбарыбыз Хазрети Мухаммед алейхиссаламдан сурашыптыр: Кайсы эл күчтүү болот жана бактылуу турмуш кечирет?

-Адамдары илимдүү, падышасы адилеттүү, кесиби эмгек, окуганы китеп, бай инсандарынын колу ачык болгон эл, – деп жооп берген экен.

Келгиле китеп окуйбуз. Келечекке ишеним менен карайбыз. Мекенибиздин өнүгүшүнө өз салымыбызды кошобуз!

Д. В. ЭРГАШЕВА,                                                                                

Ноокен району, Масы айылы, Р.Алибаев атындагы №3-орто мектебинин мугалими.