1,779 Бардыгы /

ЖАЛАЛ-АБАД. Жалал-Абад шаарындагы мектеп окуучулары арасында 13-15 жаш курактагы кыздар үчүн атайы футболдук турнир өткөрүлдү. Аталган оюн Кыргыз футбол союзунун Жалал-Абад облусунун өкүлдөрү, шаардык билим берүү бөлүмү менен биргеликте өткөрүштү.

Мындай иш-чара кыз-уландар үчүн өлкө боюнча жыл сайын уюштурулуп келет, бул жылкы кыздар аралык футболдук беттеште шаардын мектептеринен жалпы 17 команда биринчиликке ат салышып, жыйынтыгында №9 Р.Санатбаев ормо мектебинин кыздардан топтолгон курама командасы биринчиликти багындырды.

“Дайыма ар тараптуу балдарга ар кандай колдоолор көрсөтүлүп келет, ал эми бул оюнду уюштуруудан башкы максат кыздарды спорт тармагында колдоо көрсөтүп, алардын ден соолугу чың болуусуна салым кошуу болду. Бул кыздар аралык футбол турнирлери жыл сайын өткөрүлүп келет, бул жылы шаардан 17 команда катышты. Адатта кээ бир кыздарга тартынып катышпай же үйүндөгүлөр уруксат бербей келген учурлар болсо, азыр баары өз нугуна түшүп жатат. 17 команданын ичинен жакшы ойногон кыздар тандалып алынды, эми ошол кыздарга сабактарынан сырткары жумасына 2 жолу 1,5- 2сааттан тринировка болуп, облустук, республикалык беттештерге даярданышат. Эгерде республикалык турнирде дагы жакшы оюн көрсөтө алса республикалык курама командагы кирүүгө мүмкүнчүлүк алат”,-деди Кыргыз футбол союзунун Жалал-Абад облусунун өкүлү Тайирбек Чойбеков.

Болуп өткөн футболдук турнирде 13-жаштагы кыздар арасында 1-орун №9, 2-орун №19, 3-орун №3 мектептери багындырса, 15-жаштагы кыздар арасында 1-орун №9, 2-орун №10, 3-орун №4 мектептери алышты. Андан сырткары жакшы ойногон кыздарга өзгөчө наамдар ыйгарылып сыйлыктар тапшырылды.

Эске сала кетсек аталган оюн облус, шаар боюнча 2007-жылдан бери өз иштерин улантып келет. Учурда Жалал-Абад облусу боюнча 6 тренер эмгектенсе, ар биринде орто эсеп менен 20-25тен окуучулар таалим алып келишет.

Байканбек САДЫКОВ “АЙМАК”