918 Бардыгы /

Effect.uz сайтынын жетекчилиги үч кабарчысынын үстүнөн башталган сот жараянын чагылдырбайт. Басылманын редактору мындай чечимди жеке өзү кабыл алганын билдирди.

Сайттын кылмыш иши козголгон кабарчыларынын бири Элёрбек Тажибаев да кылмыш иштер тууралуу журналисттерге айтып берүүдөн баш тартты.

– Сайттын жетекчилиги бизге журналисттер менен блогерлерге сот иши тууралуу маалыматтарды бербей турууну сунуштады. Биз сотту жабык өткөрүү тууралуу өтүнүч жаздык. Анткени отурумдарга катышууну каалаган блогерлер биздин ишке эмес, контент жаратууга кызыгып жатышат, — деди Тажибаев.

Ал азыр кылмыш иши козголгон кесиптештери менен эркиндикте жүрүшкөнүн, эч кимиси адвокат жалдабаганын кошумчалады.

– Менде адвокаттарга ишенич жок. Өзүмдү алардан жакшы коргой алам, — деди журналист.

Effect.uz сайтынын үч кабарчысына козголгон кылмыш иштери боюнча сот жараяны 27-майда Кашкадарыя облустук сотунда башталган.

Өзбекстандын Жогорку сотунун маалыматына ылайык, журналист Х. Ахмедов «Бийлик өкүлүнө же жарандык милдетин аткарып жаткан адамга каршылык көрсөтүү» жана «Тергөөгө же соттук териштирүүгө кийлигишүү» беренелери боюнча айыпталууда. Акбар Нуримбетовго «Жалаа жабуу», «Кемсинтүү», «Бийлик өкүлүнө же жарандык милдетин аткарып жаткан адамга каршылык көрсөтүү» жана «Тергөөгө же соттук териштирүүгө кийлигишүү» беренелери боюнча айып тагылган.

Басылманын дагы бир кабарчысы Эльёр Тажибаев «Жалган жалаа жабуу» жана «Кемсинтүү» беренелери боюнча айыпталууда.

Effect.uz басылмасынын кабарчыларына каршы кылмыш иши козголгону быйыл 7-апрелде кабарланган. Башкы прокуратура журналисттерди Термез райондук сотунун имаратына кирип барууга жана судьяга басым кылууга айыптаган.

Журналисттер айыптоолорду четке кагууда. Алар сот имаратына Улуттук гвардиянын офицеринин уруксаты жана анын коштоосунда киришкенин билдиришүүдө. Бул учур тартылган видео басылманын сайтына жарыяланган.

WWW.