1,545 Бардыгы /

Бириккен Улуттар Уюмунун (БУУ) адам укуктары боюнча жогорку комиссары Мишель Бачелет талибдер Ооганстанда адам укугун одоно бузган учурлар боюнча так маалыматтар түшүп жатканын билдирди.

Анын айтымында, талибдер көзөмөлдөгөн жерлерде тынч калктын арасынан адамдарды өзүм билемдик менен өлүм жазасына тарткан жана аялдар менен кыздардын укугун чектеген учурлар катталууда.

“Талибдердин буга чейинки башкаруусу маалындагы адам укуктарынын бузулганын жана акыркы айлардагы адам өлтүрүүлөр жана кол салуулар жөнүндөгү көптөгөн билдирүүлөрдү эске алганда, Ооганстандагы улуттук жана диний азчылык өкүлдөрүнө карата да зомбулук көрсөтүү тобокелдиги бар”, – деди Бачелет 24-августта Женевада өткөн БУУнун адам укугу боюнча кеңешинин жыйынында сүйлөп жатып.

Өз сөзүндө ал Ооганстанда адам укуктарынын сакталышына көзөмөл кылуу боюнча орган жана атайын механизм иштеп чыгууну сунуштады.

БУУнун көз карандысыз эксперттери кабыл алган биргелешкен билдирүүдө Ооганстанда адамдардын көбү “үймө-үй кыдырып жүргөн” талибердин колуна түшпөө үчүн жашырынууга аргасыз болуп жатканы жазылган. “Бүгүнкү күндө бизге тинтүүлөр, камакка алуулар, кемсинтүүлөр, коркутуулар, менчик мүлктөрдү басып алуу жана өч алуулар жөнүндө кайрылуулар келип түшүүдө”, – деп жазылган билдирүүдө.

Ооганстанда 1996-жылдан 2001-жылга чейинки талибдердин беш жылдык башкаруусунда шарият мыйзамдары иштеп, телекөрсөтүүгө, киного, музыкага, искусствого тыюу салынып, кыздардын билим алышы чектелген.

“Талибан” бул жолу эскиче башкарбай турганын айтып, аялдардын укугун басмырлаган учурлар болбойт деп убада берген. Талибдер шарият эрежелеринин алкагында кыздарга мектепте окууга уруксат берилерин билдирген. Бирок анын убадалары ооган коомчулугунда ишеним жарата элек.

WWW.