1,680 Бардыгы /

БИШКЕК. АКШнын Кыргыз Республикасындагы Элчилиги тарыхый Бурана мунарасын консервациялоо боюнча долбоордун ачылыш аземин өткөрдү. Маанилүү иш-чарага Кыргыз Республикасынын Мамлекеттик катчысы Чолпонбек Абыкеев, Коопсуздук кеңешинин катчысы Марат Иманкулов, Маданият, маалымат жана туризм министрлигинин, жергиликтүү бийлик органдарынын жана Бурана мунарасынын музей-комплексинин жетекчилери катышышты. 

Айтмакчы, “Кыргызстандагы 11-кылымдагы Бурана мунарасын антропогендик жана сейсмикалык коркунучтардан коргоо” долбоорунда АКШ Элчилеринин маданий баалуулуктарды сактоо фондунан (AFCP) 200000 доллардан ашуун көлөмдөгү каржылоо каралган. Аталган иш-чара жергиликтүү демөөрчүлөрдүн, мунун ичинде айтылуу Шоро компаниясынын колдоосу аркасында өткөрүлдү.

АКШнын Кыргызстандагы Элчилигинин убактылуу ишенимдүү Өкүлү Соната Коултер иш-чарада сүйлөгөн сөзүндө Кыргыз маданиятына болгон урмат-сыйын мындайча баса белгиледи: – Улуу Бурана мунарасы миң жыл бою кылым карытып турду жана биз ал мындан ары дагы миңдеген жылдар бою дагыле бекем турат деп абдан үмүттөнөбүз! Бүгүн биз Кыргыздын улуттук байлыгын сактоону колдоо үчүн Кыргыз – АКШ өнөктөштүгүн өзгөчө белгилеп жатабыз.

Директор Чолпон Турдалиева жетектеген Музейдик Демилгелер Коомдук Биримдиги Борбору бул долбоорду Кыргызстандын Маданият министрлиги, Эл аралык эстелик фондунун америкалык эксперттери жана Борбордук Азиядан келген жергиликтүү эксперттер менен чогуу-чараан жүзөгө ашырмакчы. Дасыккан адистер тобу Бурана мунарасынын бузулган чатырын суу өткөрбөгөн материал менен калыбына келтиришип, антисейсмикалык техниканын жардамы менен дубалдарын жер титирөөдөн дагы бекем коргойт. Долбоор ичине мындан тышкары Маданият министрлигинин жана Бурана мунарасынын музей-комплексинин кызматкерлери, кураторлор жана реставраторлор үчүн семинарларды жана мастер-класстарды өткөрүү дагы камтылган. Ал эми Санарип Медиа өнөктүгү байыркы Бурана мунарасынын маданий эстелик катары маанисин жайылтып, көбүрөөк конокторду тартуу үчүн маалымат жайылтууну ого бетер жогорулатат.

Ошентип, АКШнын Мамлекеттик департаменти 2001-жылы Адамзаттын жалпы маданий мурасын белгилөө үчүн AFCP Уюмун түптөгөн. AFCP аркылуу АКШнын Мамлекеттик департаменти жыл сайын дүйнө жүзү боюнча абдан уникалдуу маданий мурастарды коргогон долбоорлорду гана каржылайт. AFCP каржылаган Кыргыз Республикасындагы буга чейинки долбоорлорго Өзгөн күмбөздөрүн сактоо, Кыргыз мамлекеттик тарых музейиндеги уникалдуу алтын коллекциясын калыбына келтирүү жана Жалал-Абад облусундагы 11-кылымдагы Шах-Фазил күмбөзүн сактоо кирет. Бурана мунарасын калыбына келтирүү гранты менен АКШ өкмөтү AFCP аркылуу Кыргыз Республикасындагы маданий жайларды сактоого 500 000 доллардан ашуун салым кошуп келет.

Алишер ТОКСОНБАЕВ, өз кабарчы