828 Бардыгы /

Казакстанда журналисттер менен укук коргоочулар президентке жана парламентке кайрылып, чет өлкөлүк сайттардын, социалдык түйүндөрдүн жана мессенджерлердин ишин чектөөгө жол ача турган өзгөртүүлөрдү кабыл алуудан баш тартууга чакырышты.

Онлайн-петициялардын Avaaz.org сайтына жарыяланган кайрылуунун авторлору мыйзамга сунушталып жаткан өзгөртүүлөрдү “репрессивдүү, интернетти көзөмөлдөөгө жана өлкөдө цензура киргизүүгө багытталган” деп эсептешүүдө.

Парламент мажилиси биринчи окууда кабыл алган талаштуу сунуштар “Балдардын укуктарын коргоо боюнча айрым мыйзам чыгаруу актыларына өзгөртүүлөрдү жана толуктоолорду киргизүү тууралуу” мыйзам долбоорунун бир бөлүгү болуп эсептелет.

“Сунушталып жаткан өзгөртүүлөрдүн авторлору бул нормалар кибербуллингге каршы күрөшүү жана чет өлкөлүк платформалар менен кыйла тез байланышуу үчүн зарыл экенин билдирип жатышат. Биз бул жолду натыйжасыз деп эсептейбиз. Балдардын укуктарын коргоону шылтоолоп мыйзамга өзгөртүүлөрдү киргизүү манипуляция болуп эсептелет”, — деп жазылган петицияда.

Анын авторлору өзгөртүүлөр кабыл алынса, өлкөнүн репутациясына зыян болуп, коомдук-саясий өнүгүүдө артка кетүү болорун эскертишкен. Мындан тышкары алар сунушталып жаткан өзгөртүүлөр адам укуктары жаатындагы Казакстандын эл аралык милдеттенмелерине каршы келе тургандыгын белгилешкен.

Байкоочулар интернет-алптардын көбү өзгөртүүлөрдө сунушталып жаткан шарттар менен Казакстанда өз өкүлчүлүктөрүн каттоодон өткөрүүгө макул болбойт деп эсептешүүдө. Алардын айтымында, өзгөртүүлөр азыркы вариантында кабыл алынса, интернет колдонуучулардын социалдык түйүндөр менен мессенджерлерге кирүү мүмкүндүктөрү чектелет.

Бир күнгө жетпеген убакыттын ичинде петицияга бир нече миң киши кол койду. Алардын арасында журналисттер, блогерлер, укук коргоочулар жана катардагы интернет колдонуучулар бар. Петицияны президенттин администрациясы менен парламентке 15-октябрда жөнөтүү пландалууда.

Казакстан Freedom House уюму түзгөн интернет эркиндигинин абалы боюнча ар жылкы рейтингде “интернети эркин эмес” өлкөлөрдүн катарында болуп келет.

WWW.