894 Бардыгы /

БИШКЕК. Кыргызстандын Акыйкатчысы Токон Мамытов Бишкек шаарынын убактылуу кармоочу жайына баш багып, андагы ички иштер министринин мурдагы орун басары Курсан Асанов менен бетме-бет жолукту.

Акыйкатчы институту тараткан маалыматка караганда, генерал Курсан Асанов анын Алмаз Сарыбаев менен бийликти басып алуу жөнүндө сүйлөштү делген аудио жазылмага техникалык экспертиза жүргүзүлүп, жыйынтыгы чыккандыгын билдирди.

-Орусия менен Казакстанда жүргүзүлгөн көз карандысыз  экспертизанын жыйынтыгы акыры колума тийди. Буга ылайык, аудио жазылма алты жеринен кескиленип, түрдүү убакта, түрдүү сүйлөшүүлөрдү колдонуу менен атайылап жасалгандыгы аныкталды, — деди ички иштер министринин мурдагы орун басары Курсан Асанов.

Курсан Асанов ошондой эле Акыйкатчыга ИИМдин имаратын басып албагандыгын дагы бир ирет айтып, окуя кандайча болгондугун мындайча түшүндүрдү.

-Өткөн жылдын 6-октябрында ИИМдин имаратына келсем, ал жерде мурдагы ички иштер министри менен дагы башка бейтааныш адамдар бар экен. Ошол жерден мага УКМКдан чакыруу түштү, ойлонбостон жөнөп кеткем. Ал эми ички иштер министринин милдетин аткарууга Коопсуздук кеңешинин катчысынын орун басарынын жазуу түрүндөгү буйругун алгандан кийин киришкем. Эң башкысы мен ИИМдин жамаатына расмий түрдө тааныштырылгам, — деп кошумчалады Курсан Асанов.

Сөзүнө далил катары Курсан Асанов Коопсуздук кеңешинин 6-октябрдагы катынын (Курсан Асановду ички иштер министринин милдетин аткаруучу кылып дайындоо жөнүндө) көчүрмөсүн дагы көрсөттү. Анткени, Курсан Асанов былтыр 14-сентябрда бийликти күч менен басып алууга шектелип Жазык кодексинин 309-беренесинин негизинде кармалган. Бишкектин Биринчи май райондук сотунун чечими менен генерал өзгөчө оор кылмыш жасагандар кармалуучу №50-тергөө абагына эки айга камакка алынган. Бул иш боюнча “Толубай” коммерциялык Банкынын директорлор кеңешинин мүчөсү Алмаз Сарыбаев дагы камалып олтурат. Ал Бишкектеги №1-тергөө абагына киргизилген.

Алишер ТОКСОНБАЕВ, өз кабарчы