1,023 Бардыгы /

Тажикстанда күйүүчү май кымбаттаган сайын транспорт чыгымдары көбөйүп баратат. Буга байланыштуу бийликтен велосипедисттер үчүн ыңгайлуу шарт түзүүнү сунуштагандар арбыды.

Атайын жол жана токтотмо жайлардын жоктугуна байланыштуу шаарда велосипед менен жүрүү кыйын.

Бахтиёр Мирзоев эки жылдан бери жумушка велосипед менен барат. Ал англис тилинен сабак берет. Мугалимдин айтымында, велосипед чыгым талап кылбайт, анын менен каалаган жерге өз убагында жетүүгө болот. Мирзоев күндө 20-40 чакырым жол жүрөт.

“Мен мындан ары коомдук транспорт менен жүрбөйм. Өтө муктаждык болбосо, ага отурбайм. Велосипед менен гана жүрөм, ден соолукка да пайдалуу. Менин сунушум – жаштарды, кыз-келиндерди велосипедге тартуу керек”, — деди ал.

Бахтиёр Мирзоев бийликтен шаарда велосипедчилерге шарт түзүүнү, мектептер менен жогорку окуу жайлардын жанына велосипед токтотуучу орундарды салууну сунуштады. Ал токтотмо жайлардын жоктугунан эки жолу велосипедин уурдаткан.

Тажикстан бийлиги жашоочулардын велосипедге болгон кызыгуусун арттырууга аракет жасап жүрөт. Акыркы жылдары веломарафондор уюштурулуп, велоспорт күнү жарыяланууда. Жакында республикада велоспорт боюнча Азия чемпионаты өттү. Душанбеге 27 өлкөдөн 400дөн ашык спортчу келди. Ага карабай Тажикстандын борбордук калаасында азыркы күнгө чейин атайын веложолдор жок.