1,167 Бардыгы /

Тажикстандын Ички иштер министрлиги (ИИМ) “Озоди” радиосу менен “Настоящее Время” телеканалынын кабарчыларына кол салуу фактысы боюнча “Тоноо” беренеси менен кылмыш ишин козгоду. Бул тууралуу “Адам укуктарын коргоо боюнча көз карандысыз борбор” уюму билдирди.

“Озоди” радиосу менен “Настоящее Время” телеканалынын журналисттери Анушервон Арипов, Насим Исамов, Муллоражаб Юсуфзодф жана Барот Юсуфи 17-майда бадахшандык активист Ульфатхоним Мамадшоевадан интервью алгандан кийин кол салууга кабылышкан. Жарандык кийимчен адамдар журналисттерди күч менен автоунаадан чыгарып, алардын кызматтык техникаларын жана телефондорун тартып алышкан. Ошол эле күнү бийлик Мамадшоеваны Хорогдогу башаламандыктарды уюштурууга айыптап, ага каршы “Конституциялык түзүлүштү күч менен алмаштырууга ачык чакырык жасоо” беренеси менен кылмыш ишин козгогон.

28-майда белгисиз киши көчөдө Муллоражаб Юсуфзодага жолугуп, журналисттер милицияга жазган арызын кайтарып алса кызматтык техникалары менен телефондорун кайтарып берерин, болбосо алардын үй-бүлө мүчөлөрү өздөрүн коопсуз сезбей каларын айткан.

Журналисттер 17-майда болгон окуя тоноого окшобогонун билдирип жатышат. Алардын айтымында, кылмышкерлер кабарчылардын диктофон, видеокамера жана телефондорун тартып алып, акчаларын кайра кайтарып беришкен.

Буга чейин бир катар эл аралык журналисттик уюмдар “Озоди” радиосу менен “Настоящее Время” телеканалынын кабарчыларына кол салууну айыпташкан.

20-майда Журналисттерди коргоо комитети (Committee to Protect Journalists) Тажикстандын бийлигин ЖМК өкүлдөрүнө кол салынганы боюнча адилет тергөө жүргүзүүгө чакырган.

6-июнда Тажикстандагы журналисттик уюмдар, мамлекеттик жана жеке гезиттердин редакциялары бийликтен “Озоди” радиосунун журналисттери менен белгилүү блогер Далер Имомалиге кол салгандарды табууну жана жоопкерчиликке тартууну талап кылышкан.

Биргелешкен билдирүүгө кол койгон 11 редакция менен журналисттик уюмдар бийликтен журналисттерге басым жасоону, аларды куугунтуктоону жана ур-токмокко алууну токтотууну талап кылып, ошол эле маалда ЖМКларды “Тажикстандын улуттук кызыкчылыктарын, дүйнөдөгү жана аймактагы абалды эске алып, өлкө мыйзамдары менен профессионалдык-этикалык нормаларды бузбастан иштөөгө” чакырышкан.

Тажикстандын бийлиги өлкөдөгү медиауюмдардын бул билдирүүсү боюнча эч кандай комментарий берген эмес.

WWW.