1,643 Бардыгы /

Жалал-Абад шаар мэриясында Түркиянын Кыргызстандагы ыйгарым укуктуу элчиси менен шаар башчылары жаңы инвестициялар тууралуу кеңири пикир алышты. Ал эми Туркиянын элчиси саламаттыкты сактоо жана билим берүү жагынан конкреттүү сунуштарын ортого салды. Бул тууралуу шаар мэриясынан билдиришти.

Бүгүн, 11-февраль күнү Жалал-Абад шаардык кеңешинин төрагасы Айбек Джолдошев, биринчи вице-мэр Майрамбек Адылбеков жана социалдык иштер боюнча вице-мэр Руслан Алтымышев баш болгон шаар жетекчилери Түркиянын Кыргызстандагы атайын жана ыйгарым укуктуу элчиси Женгиз Камил Фырат баштаган делегацияны кабыл алышты.

Жолугушуу учурунда эки тараптуу кызматташуу жана элдердин ортосундагы коомдук байланыштарды күчөтүү багытында сүйлөшүүлөр жүрдү. Элчи Түркияда жасалчу оор операцияларга Жалал-Абад шаары үчүн акысыз 4 квота берүү, ошондой эле мугалимдеринин айлык маянасы жогору болгон заманбап мектеп куруу сунушун айтты. Аны менен бирге текстиль жана айыл чарба тармагында адистерди окутуп даярдоо, логистикалык борбор ачуу долбоорлорун ишке ашырса болоорун кошумчалады.

Ал эми Жалал-Абад шаарынын биринчи вице-мэри Майрамбек Адылбеков Түркиянын шаарлары менен боордоштук-мамиле кызматташтыгын курууга шаар бийлиги кызыкдар экендигин, учурда Түркия элчилигине сунуштоочу 10 долбоор бар экенигин айтты.

Түркия элчилиги сунушталган долбоорлор менен кагаз жүзүндө таанышып чыгып, жыйынтык чыгарарын билдирди.

“Аймак”