1,155 Бардыгы /

          БАТКЕН. Баткенде Кыргыз-Тажик чек арасындагы куралдуу кагылышта талкаланып, жашоого жараксыз кейипти кийген 422 үй урандыдан арылтылды. Бир үй чек ара тилкесинде жайгашкандыгы  үчүн тазаланган жок.

Өзгөчө кырдаалдар министрлигинин маалыматына караганда, бузулган үйлөрдүн басымдуу бөлүгү  – 322 турак жай Баткен районунда. Ал эми Лейлек районунда 101 үй жабыркаган. Ьаары тең тазаланды. Аталган министрлик жаңжал маалында коопсуз аймактарга эвакуациялангандардын 4 миңдейи туруктуу жашап жаткан жайларына келе электигин ачыктады.

Кыргызстан менен Тажикстандын ортосундагы соңку куралдуу кагылышта Кыргыз айылдарынан 661 турак жай өрттөлүп, талкаланган. Анын 423ү жашоого жараксыз кейипти кийген. Дагы 238 үй оңдоп–түзөөгө муктаж. Мындан тышкары 11 административдик, стратегиялык обьектилер, 335 мал сарай, сегиз мектеп, эки бала бакча, үч фельдшердик–акушердик бекет жапа чеккен. 197 жашоо тиричилик камсыздоочу обьектилер талкаланып, анан дагы өрттөлгөн. Ак–Суу дарыясындагы узундугу 36 метрлик автоунаа өтүүчү көпүрө жардырылып, 61 автоунаа өрттөлгөн, же талкаланган. Кыргыз бийлиги жаңы үйлөрдү эки–үч айда курууну убада кылууда.

Алишер ТОКСОНБАЕВ, өз кабарчы