1,860 Бардыгы /

ЖАЛАЛ-АБАД. Жалал-Абад облусунун аймагында ички иштер органдары тарабынан элге сервистик тейлөөлөрдү көрсөтүү, санариптештирүү багытында жумуштар аткарылды.

Жалал-Абад ОИИБдин басма сөз кызматы билдиргендей, облус аймагында 10 бирдиктүү терезе шартындагы борборлор элге сервистик тейлөөлөрдү көрсөтүүдө. Анын төртөө 2022-жылы жаӊыдан курулуп, пайдаланууга берилди. Алар Базар-Коргон, Аксы, Ала-Бука, Чаткал райондук ички бөлүмдөрү тарабынан ишке киргизилди.

Жалпысынан облустагы борборлорго 11 айда чет элдик 633 жана өлкөбүздүн 39 159 жараны соттуулугу бар же жоктугу тууралуу ырастамаларды алуу үчүн кайрылган. Ок атуучу курал-жаракка уруксат кагаздарын алуу үчүн 424 жаран кайрылган.

Милиция имараттарынын нөөмөт бөлүмдөрүндө, административдик камераларда жана убактылуу кармоо жайларында 30 видео камера; милиция бөлүмдөрүнүн короолорун кароого 105 видео камера; облустагы район борборлоруна, коомдук жайларга, көчөлөргө жалпысынан 123 видеокамералар орнотулган.

Жалал-Абад ОИИБдин нөөмөт бөлүмү ремонттон өткөрүлүп, акыркы үлгүдөгү мониторлор орнотулган. Мониторго облустун коомдук жайларындагы, ички иштер бөлүмдөрүндөгү видеокамералар туташтырылган. Ошондой эле Жалал-Абад ОИИБдин жетекчилиги дагы көрүү мүмкүнчүлүгү бар.

«Акылдуу шаар» долбоорунун экинчи этабынын негизинде облустагы “Бишкек-Ош” унаа жолунун 30 участкаларына жана “Жалал-Абад-Казарман” унаа жолунун 6 участкасына, Жалал-Абад шаарынын 12 көчөлөрүнүн кесилишине видеокамералар коюлган. Жалал-Абад ОИИБдин имаратына 2 даана электрондук кулптар орнотулуп, ишке киргизилген.

Электрондук иш кагаздарын жүргүзүү үчүн бардык милиция бөлүмдөрүнүн кеңселери заманбап компьютердик техникалык жабдуулар менен камсыздалып, жашыруун канал аркылуу электрондук дарекке туташтырылган.

https://youtu.be/Kr0_VzvgVuU видеороликтин ссылкасы.