1,473 Бардыгы /

ЖАЛАЛ-АБАД. Тогуз-Торо районундагы “Макмал Голд Компании” ишканасы тарабынан кайрымдуулук иш-чарасы өткөрүлдү. Бул тууралуу аталган ишкананын басма сөз кызматы билдирди.

Айлардын султаны ыйык Рамазан айында жакшы ниет, аруу тилектер айтылып, кайрымдуулук иштери арбын болот эмеспи. Быйыл 2023-жылы ыйык Рамазан айынын урматына Тогуз-Торо районунда жалгыз ири өндүрүш ишкана “Макмал Голд Компани” ЖЧКты кайрымдуулук ишин жасап, калктын аярлуу катмарына кирген, аз камсыз үй-бүлөлөргө жана мүмкүнчүлүгү чектелген жарандарга, жалпы Тогуз-Торо районунун 5 айыл өкмөтүнөн 80 (сексен) үй-бүлөнүн ар бирине 25 кг ун, 3 литр май, 5 кг кумшекер, 5 кг макарон,  3кг кесме жана чай жалпы наркы 201 200 сомдук  азык-түлүк таратылды. Мындан сырткары райондун жарандары оор ооруга чалдыгып, чет өлкөлөрдөн операция жасатууга жана дем алдыруучу аппарат алууга жардам сурап ишканага кайрылуу жолдошкон. Ыйык Рамазан айында ооруга чалдыккан мекендештерибиздин сакайып кетүүсүнө себепкер болуу максатында 4 (төрт) жаранга 50 (элү) миң сомдон акчалай жардам көрсөтүлдү. Кайрымдуулук иш-чарага Кыргыз Республикасынын Министрлер Кабинетинин төрагасынын коомдук кеңешчиси Токтожумаев Урмат, Тогуз-Торо райондук мамлекеттик администрация башчысы аким Карагулов Мирлан, акимдин биринчи орун басары Дамир Тагайбек уулу, “Макмал Голд Компани” ЖЧКтын директору Асеинов Руслан, “Макмал Голд Компани” ЖЧКтын директорунун биринчи орун басары Замир уулу Чубак, өндүрүш боюнча директордун орун басары Насирдинов Руслан жана айыл өкмөт башчылары, социалдык кызматкерлер катышышты.

Иш-чаранын жүрүшүндө ыйык Рамазан айы менен куттуктоолор жана каалоо –тилектер айтылып, жардам алган эл тарабынан ыраазычылык сөздөр сүйлөндү. Иш-чаранын жыйынтыгында жалпы Тогуз-Торо районунун аксакалдарына ооз ачыруу өткөрүлдү.

Урматтуу мекендештер ыйык Рамазан айы кут болсун, кармаган орозоңуздар кабыл болсун!