633 Бардыгы /

БИШКЕК. Ысык-Көлдүн жээгиндеги төрт пансионат («Дилором», «Золотые пески», «Рохат» жана «Бустон») мындан ары Өзбекстанга 49 жылга башкарууга тапшырылат. Бул туурасында Мамлекеттик мүлктү башкаруу агенттигинин директору Канатбек Тургунбеков шардана кылды.  

Кыргыз Өкмөтүнүн мүчөсү Канатбек Тургунбеков баса белгилегендей, Өзбекстан пансионаттардын ар бирине 15-20 миллион доллар инвестиция жумшоону көздөп жаткан чагы. Кыргыз Өкмөтү 2020-жылы эле «Алтын кум», «Рохат» жана «Дилором» мамлекеттик пансионаттарын жеке менчикке башкарууга берүү ниетин ачыктаган. Мамлекеттик мүлктү башкаруу фонду бул жайлар мамлекеттин менчиги болуп кала берээрин, бирок, инвесторго убактылуу гана башкарууга берилээрин кошумчалаган.

Баса, 2016-жылы Кыргыз Өкмөтү Совет доорунда Ысык-Көлдөгү Өзбекстан пайдаланып келген төрт пансионатты менчиктештирүү боюнча токтом чыгарган. Эс алуу жайларынын аталыштары дагы дароо кыргызчаланып, «Рохат» – «Алтын жай», «Дилором» – «Эне-Сай», «Золотые пески» – «Бостери» деп өзгөртүлгөн. Ал эми «Бустон» пансионатынын аты ошол эле бойдон калган.

Алишер ТОКСОНБАЕВ, өз кабарчы