834 Бардыгы /

          Жетишилген атайын макулдашууга ылайык, үстүбүздөгү жылдын 11-ноябрынан тартып 17-ноябрына дейре Баткен шаарында коңшулаш эки өлкөнүн өкмөттүк делегацияларынын Кыргыз-Тажик мамлекеттик чек арасын делимитациялоо жана демаркациялоо боюнча топографиялык жумушчу топторунун кезектеги жолугушуусу абдан катуу мүнөздө жүрдү.

          Топографиялык жумушчу топтор калган талаш участоктордогу Кыргыз-Тажик чек арасынын долбоордук сызыгын сыпаттоо маселесин өз ара кенен-чонон талкуулашты жана бул ишти Тажикстан аймагында өтө турган кийинки отурумда дагы ырааттуу улантууну чечишти. Ошентип, аталган расмий жолугушуунун жыйынтыгында тиешелүү протоколго дагы кол коюлду.

          Эскерте кетчү жагдай: Кыргызстан менен Тажикстандын ортосундагы мамлекеттик чек аранын узундугу 950 чакырымдан арбыныраак. Буга чейин тараптар 626 чакырым боюнча долбоордук тактоо, сүрөттөп чыгуу иштери жасалгандыгы айтылган. 2021-жылдын май айынан тарта топографиялык топтор Кыргыз-тажик чек арасынын 101, 86 чакырымын тактап, сүрөттөп жазып чыгышкандыгы маалым.

          Алишер ТОКСОНБАЕВ, өз кабарчы