12 Бардыгы /

Айтылуу Үч-Коргон ГЭСиндеги №3-гидроагрегатты реконструкциялоо долбоорунун алкагында кеңири масштабдагы иштер дагыле улантылууда. Энергетика министрлигинен билдиришкендей, бүгүнкү күндө №3-гидроагрегатты демонтаждоо иштери 91 пайызга аткарылып, иштер абдан активдүү жүрүп жаткан чагы.

Баса, Үч-Коргон ГЭСин реконструкциялоонун алкагында төмөнкү негизги этаптар жүзөгө ашырылууда:

• Жумушчу дөңгөлөктүн бычактарын демонтаждоо;
• Жумушчу дөңгөлөктүн камерасын демонтаждоо;
• 3-гидроагрегаттын техникалык суу менен жабдуу түтүктөрүн монтаждоо;
• Статордун темирин чогултуу;
• Жаңы борбордук башкаруу пультунда станцияны башкаруу тутумун жөндөө.

Белгилей кетчүү жагдай: 3-гидроагрегатты ишке киргизүү 2025-жылдын ноябрь айына пландаштырылган. Реконструкциялоо бүткөндөн кийин анын кубаттуулугу 54 МВтты түзөт, бул модернизацияга чейинки көрсөткүчтөн 9 МВтка дагы көп. Бул бекеттин  жалпы өндүрүмдүүлүгүн жогорулатып, региондун энергетикалык туруктуулугун ого бетер бекемдейт.

Алишер ТОКСОНБАЕВ, өз кабарчы