3 Бардыгы /

Бүгүн, 22-декабрь Энергетика күнү – бул маанилүү майрам, анткени кандай гана иш болбосун, алгач электр энергиясынан башталат. Өлкөдөгү жалпы өнүгүүлөр менен катар энергетика тармагында жүргүзүлүп жаткан реформалардын натыйжасында «КУЭТ» ААКнын филиалы — Жалал-Абад электр тармактар ишканасында 2025-жылдын ичинде бир катар орчундуу иштер аткарылды.

Жалал-Абад электр тармактар ишканасынын маалымат кызматы билдиргендей,

облустагы курулуштардын жана инфраструктуралык өнүгүүлөрдүн өсүшү электр энергиясына болгон талапты күчөттү. Бирок энергетиктердин тынымсыз аракети, бирдиктүү жана жоопкерчиликтүү эмгегинин аркасында миллиондогон үйлөрдө жарык үзгүлтүксүз камсыздалып келет. Бул — энергетиктердин мээнетинин айкын жыйынтыгы.

Майрамдык иш-чарага Кыргыз Республикасынын энергетика министринин орун басары Алтынбек Рысбеков, Кыргыз Республикасынын Жалал-Абад облусундагы ыйгарым укуктуу өкүлү Тилек Текебаев, ошондой эле тийиштүү мекеме-ишканалардын өкүлдөрү катышты.

Салтанаттуу жыйында сүйлөгөн сөзүндө энергетика министринин орун басары Алтынбек Рысбеков энергетиктердин эмгеги өлкөнүн туруктуу өнүгүүсүнүн негизги факторлорунун бири экенин белгиледи. Ал энергетика тармагында жүргүзүлүп жаткан реформалар кызматкерлердин эмгек шарттарын жакшыртууга жана тармактын ишенимдүүлүгүн арттырууга багытталганын айтып, энергетиктерди кесиптик майрамы менен куттуктады.

Өз кезегинде облустун ыйгарым укуктуу өкүлү Тилек Текебаев энергетиктердин эл үчүн аткарып жаткан кызматы өзгөчө мааниге ээ экенин белгилеп, алардын талыкпаган эмгеги аймактын социалдык-экономикалык өнүгүшүнө түздөн-түз таасир этерин баса белгиледи. Ошондой эле ал энергетиктерге ыраазычылык билдирип, иштерине ийгилик каалады.

Салтанаттын жүрүшүндө энергетиктердин калкты үзгүлтүксүз электр энергиясы жана жылуулук менен камсыз кылуудагы жоопкерчиликтүү, түйшүктүү эмгегин баалоо максатында уюштурулду. Анын алкагында энергетика тармагында үзүрлүү иштеп, жогорку кесипкөйлүгүн көрсөткөн бир нече кызматкерлерге ардак грамоталар тапшырылды.

Майрамыңыздар менен энергетиктер!