3 Бардыгы /

Кыргыз Республикасынын Аскер прокуратурасы кызматынан бошотулган мурдагы Өзгөчө кырдаалдар министри Урматбек Шамыркановдун үстүнөн кылмыш ишин козгоду. Буга Өзгөчө кырдаалдар министрлигинин офицеринин Шамырканов “Пара талап кылды” деп Президент Садыр Жапаровго даттануусу негиз болгондугун Башкы прокуратурадан кошумчалашты.

          Маалыматка караганда, ушул тапта мурунку Өзгөчө кырдаалдар министри Урматбек Шамырканов аталган мекеменин кызматкеринен пара талап кылган жагдайы өзүнчө иликтенип жатат. Буга ылайык ар тараптуу тергөө дагы кызыды. Эми ошонун жыйынтыгына жараша тийиштүү укуктук баа дагы берилмекчи.

Айтмакчы, ушул жылдын 10-марттында президент Садыр Жапаровдун буйругу менен Урматбек Шамырканов күтүүсүздөн кызматынан бошотулган. Буга “Кол алдында иштеген кызматкерден жогорку деңгээлдеги кызмат ордуна көтөрүү үчүн пара талап кылууга шектелип жаткандыгы” себепкер экендигин Президенттин басма сөз катчысы Аскат Алагөзов шардана кылган. Урматбек Шамырканов Өзгөчө кырдаалдар министринин орун басары болуп иштеп жүрүп, быйыл 16-февралда Президенттин Указы менен министр болуп дайындалган эле.

Алишер ТОКСОНБАЕВ, өз кабарчы