879 Бардыгы /

Жогорку Кеңешке депутат болуу үчүн 20дан ашык журналист ат салышууда. Алардын кээ бирлери партиялык тизмеде, айрымдары бир мандаттуу округдардан талапкер болуп катталган.

Арасында резонанс жараткан иликтөөлөр аркылуу эл оозуна түшкөн кабарчылардан тартып, жеке канал ачып блогерлик менен алектенип жүргөндөрү да бар.

Жалпыга маалымдоо каражаттарынын үстүнөн түшкөн даттанууларды караган комиссия парламенттик шайлоодо талапкер болууну көздөгөн журналисттерге 13-октябрда кайрылып, саясатка аттанып жатканын коомчулукка жар салып коюуну сунуштаган. Бирок аны талапкер болуп катталган журналисттерди айрымдары гана аткарган.

Комиссия бул кайрылууну Кыргызстандык журналисттердин этикалык кодексинин 5-беренеси менен бекемдейт. Ал беренеде “Журналист кай бир партияга мүчө болуудан, саясий ишмердиктен, мамлекеттик кызматта жана жергиликтүү өз алдынча башкаруу органдарында иштөөдөн оолак болгону абзел. Эгер андай иштерге аралаша турган болсо, ал тууралуу өз окурмандарын, угармандарын жана көрүүчүлөрүн кабардар кылышы керек”, – деп жазылган.

Медиа коомчулук өкүлдөрү журналисттер депутат болуп келсе, сөз эркиндигин бийликтин трибунасынан туруп коргоого салым кошот деген үмүт бар экенин белгилешет.

Кыргызстан басма сөз эркиндиги боюнча Борбор Азияда жана айрым КМШ өлкөлөрүнүн арасында туруктуу түрдө алдыда келе жатат. “Чек арасыз кабарчылар” эл аралык уюмунун “Басма сөз эркиндиги” аттуу рейтингинде Кыргызстан быйыл 180 мамлекеттин ичинен 79-орунда.

WWW.