2,874 Бардыгы /

ЖАЛАЛ-АБАД. Кечээ, 26-апрелде Жалал-Абад шаары боюнча ЖКККБ жана шаардык билим берүү бөлүмү тарабынан жол кыймылынын жаш инспекторлорунун кароо-сынагы болуп өттү.

Жалал-Абад ОИИБдин басма сөз кызматы билдиргендей, кароо-сынакка Жалал-Абад шаарындагы 17 мектептин командалары катышып, Р.Санатбаев атындагы №9 инновациялык мектеп гимназиясында уюштурулду.

Сынактын катышуучулары атайын түзүлгөн программанын алкагында өз өнөрлөрүн көрсөтүштү. Алгач саптык кароодон өтүшүп, жол белгилери боюнча суроолорго жооп беришти. Жол эрежелерине байланыштуу сахналаштырылган көрүнүштөр да көрсөтүлдү. Жаш инспекторлор өздөрүнүн чыгармачылыгы менен жасаган дубал газеталары, ар түрдүү жол белгилер камтылган макеттер калыстардын сынына коюлду.

Ар бир бөлүктүн соңунда калыстар тобу тарабынан командаларга упайлар коюлуп жатты. Сынактын жалпы жыйынтыгында 1-орунду №4 мектептин жаш инспекторлору багындырды. Ал эми 2-орунду №5 мектептин командасы ээлесе, 3-орунга №2 жана №17 мектептердин окуучулары татыктуу болушту.

Жеңүүчүлөргө уюштуруучулар тарабынан дипломдор жана жол кыймылынын эрежелери камтылган тест вариантындагы атайын китепчелер тапшырылды.