3,186 Бардыгы /

Жакында Баткен районунун Бужум айылындагы «Таяныч» балдар борборунда «Биз башкабыз, бирок теңбиз» деген аталыштагы форум болуп өттү.
Аталган форум Германиялык Эл аралык кызматташтык уюмунун каржылык колдоосу астында, «Ар бир балага үй-бүлө» коомдук фонду тарабынан жүргүзүлүп жаткан «Кыргызстандын түштүгүндө жашаган жаштар арасында чыр-чатактарды трансформациялоо» долбоорунун негизинде өткөрүлдү.
Форумга Баткен райондук мамлекеттик администрациясынын башчысы – акимдин орун басары К.Кыдырова жетектеген тиешелүү жергиликтүү бийлик өкүлдөрү жана мекеме-уюмдун жетекчилери, «Таяныч» жана Жалал-Абад облусуна караштуу Базар-Коргон айылындагы «Келечек» балдар борборунун окуучулары жана мугалимдери катышышты.
2013-жылдын апрель айынан баштап Германиялык Эл аралык кызматташтык уюму жогоруда аталган долбоорду каржылап, учурда англис тилин жана компьютерди үйрөнүү курстары уюштурулуп, Кара-Булак айыл өкмөтүнүн мектептеринен 90 окуучу акысыз билим алууда.
Форумдун негизги максаты эки облустун балдар борборунун окуучулары менен достукту, патриоттуулукту, борбордун кызматкерлери менен кызматташууну жана ошондой эле тааныштырууну камсыз кылуу болуп саналат.
Жалал-Абад облусундагы «Келечек» күндүзгү борбору Базар-Коргон районунун социалдык өнүктүрүү башкармалыгынын үй-бүлөнү жана балдарды колдоо бөлүмү менен тыгыз иш алып барып, учурда Базар-Коргон районунун бардык айылдарынан 25 жашы жете элек өспүрүмдөр келишет. 2012-жылдан бери борбордон кызмат алган балдардын саны 250нү түзөт.

Гүлчехра Тажибаева, Баткен