3,686 Бардыгы /

Мекенчил болобуз деп деп ураан таштап,

Миң жолу айткан сөзү мээңди чагат.

Мертинтип ойлоруңду оргуштаган,

Менменсинип улум-улам төшүн кагат.

Жар салып жадап деле бүтүшпөдү,

Жарытылуу иш деле бүтүрбөдү.

Киргилдентти көңүлдү жалган айтып,

Калктын кайда калп сөзгө түшүнмөгү.

Мекенчил болсок эгер баарыбыз,

Мөлт-калт болмок океандай байлыгыбыз.

Биримдиктин отун жаксак өчүрбөй,

Билинбей калмак эле жардылыгыбыз.

Сараңдыктын сыйрып туруп жарасын,

Саргайганга, бозоргонго, кордолгонго каралаш.

Сообу тиет эрте-кечпи акыры,

Сумсайгандын баары бизге санаалаш.

Мекенчил болгондор бар деңизчи,

Материкке жете турган мээрими.

Андай болгон ак жүрөктөр саналуу,

Алоолонгон Ата-Журтка сезими.

Көксөгөндөн үмүт этип дагы да,

Кубат алам кыргызымдын деминен.

Калсын оңбой, оңкосунан сайылсын,

Кыргыз элин көз көрүнө жээриген!…

Рысбай ЖУМАБЕКОВ, Сузак району,  Ынтымак айылы