4,320 Бардыгы /

Бул чайнек, пиаладагы чай былтыр Ноокен районундагы бир чайханада чай ичкенче тартылган. Жалал-Абад, Ошто  эмне көп, чайханалар, чай ичкендер көп. Чайханадагы чарпаяларга (тапчан) отуруп алышып, түйүнчөктөрүн маккам (бекем), ишеничтүү таризде өздөрүнө жакын коюп, шашпаай чай ичип отурган мүнөздүү көрүнүш.

Чайханачылар демдеп берген чайнектен өз колдору менен майда пиалага утуру куюп ичип, ыссык наавай нандан тиштеп, майда чайнап отурганды жактырышат. Эгерде бир адам отуруп чай ичем десе деле чайханачылар бир чайнек менен 2 пиала алып келип беришет. Бул эч жерде жазылып, айтылбаганы менен өзүнөн-өзү түшүнүктүү, анткени чай ичилгенден кийин, ш(ч)амасин (түбүн) бош турган пиалага төгүп таштап, дагы ыссык чайдан куюп алып, аны колу менен айландырып, чеберчилик менен чайпалтып, төгүп-чачип албай, үйлөөп-үйлөөп коюп иче беришет.   

Сырттан карагандарга ушинтип шашпаай отургандар бир жагынан бул жашоого топуктук менен карап, “Барына Шүгүр” деп отургандай  да сезилип кетет. Бирок  экинчи жагынан дайым эле мындай эместей.

Бир чарпаяда эки-үч же төрт- беш бейтааныштар отуруп калса, биринин чайы түгөнүп, кайра алдыргыча жанында отургандар “келиңиз” деп өз чайнегиндеги чайдан куюп, тиги чайын күтүп калган адамга сунуп, ал адам “иче бербейсизби” сөзүн айтканы менен сунган колду суутуп, көңүлүн оорутуп койбоюн деген ички сый-урмат, аёо менен чайды сыпаа алып ичип коет.

Ошентип отурганча эмне маселе боюнча жүргөнүн эч ким сурабаса деле бирөөсү сөз баштап, сөздөрү жагдайга жараша сыпайы суроо-жооптор менен улана берет. Таң калычтуусу бул жерде бир дагы “Ээ, эмне сурап жатасын, ишиңиз эмне”  сыяктуу одоно сөздөргө ныпым орун жоктой. Тек гана, кептин контентине (мазмунуна) жараша бирде жылмаю, бирде аёо, бирде тамаша байкалган майин, жумшаак кобурашуулар аркылуу бир жеңилдеп калышкандай көрүнүп кетет)

Колдоп, коштогон сөздөрү аягына чыгып, бири-бири  менен жылуу коштошуп жатышып, буга салам айтыңыз, тигини көрүп калсаңыз менден салам айтып коюңуз, майли эми, “көрүшүп-көрүшпөсөк да тынч бололу” дешип, бара турган жактарына бет алышат.

Эми, чайхана демекчи, илгери союз учурунда Жалал-Абад шаарына белгилүү “Ялла” ырчылар тобу  “Чайхана на все времена” жарнамасы менен келип, ырдап кетишкенин мен ошол учурдагы “Ленинчил жаш” гезитине “Чайхана бардык убакта”  темасы менен кабар жөнөтө калсам, ленинчилер “Өмүрү соолбос чайхана” деп  темасын гана өзгөртүшүп, калган айткан-дегендерим ошол эле боюнча гезит бетинен орун алганы да оюма келе калбадыбы

Узаак жашап, ысык чайдан ичип жүрө бериңиздер.

Зирек Асанова, Бишкек шары