1,446 Бардыгы /

БАТКЕН. Президенттин Ош облусундагы ыйгарым укуктуу өкүлү Зиядин Жамалдинов үстүбүздөгү жылдын сентябрында Кыргыз-Тажик чек арасындагы куралдуу кол салуудан набыт тапкан Ош облусунун тургундары менен жолугушту.

Ошентип, Ош облусунун башчысы Зиядин Жамалдиновөзүнүн резервдик фондунан 5 жоокердин үй-бүлөсүнө 50 миң сомдон, ал эми Баткенден эвакуацияланып, ушул тапта Ош облусунда жашап жаткан 1 үй-бүлөгө 20 миң сом тапшырды. Зиядин Жамалдинов өз сөзүндө чек араны коргоп жатып баатырларча курман болушкан жоокерлердин эрдиги эч качан унутулбай тургандыгын дагы баса белгиледи.

Эске сала кетээрибиз: үстүбүздөгү жылдын 14-17-сентябрында Тажикстан Кыргызстанга куралдуу агрессия жасап, мурда сүйлөшүлгөн бардык макулдашууларга карабастан, Кыргыз-Тажик мамлекеттик чек арасынын бардык периметри боюнча, тактап айтканда, Баткен облусундагы жана Ош облусунун Чоң-Алай районундагы чек аралык жана жарандык обьекттерге ачык эле чабуул жасаган. 140 миңге жакын кыргызстандык чек арага жакын калктуу конуштардан эвакуацияланган. Саламаттык сактоо министрлигинин маалыматына караганда, куралдуу кагылыштан 63 кыргызстандык (аскер кызматкерлери жана жай тургундар) шейит болуп, 198 киши жабыркады. Ошондой эле турак үйлөр, чарбалык жана социалдык, турмуш-тиричиликти камсыз кылуучу обөектилер талкаланган жана жабыркаган.

Алишер ТОКСОНБАЕВ, өз кабарчы