1,986 Бардыгы /

АКШ Украинага 175 миллион долларга бааланган аскердик жардамдын жаңы топтомун жөнөтөт. Бул тууралуу Мамлекеттик департамент билдирди.

Маалыматка караганда, жаңы топтомдун курамында абадан коргонуу жана HIMARS ракеталык системалары үчүн ок-дарылар, 155 жана 105 миллиметрлик артеллериялык снаряддар, танкка каршы Javelin жана AT-4 комплексттери үчүн ракеталар, жүк ташуучу автоунаалар, радиолокацияга каршы HARM ракеталары жана 4 миллиондон ашык ок, миналар болот.

АКШнын мамлекеттик катчысы Энтони Блинкендин айтымында, эгер Конгресс Украинага кошумча каражат бөлүү тууралуу президент Жо Байдендин сунушун жактырбаса, бул Вашингтон Киевге бере турган жардамдын акыркы топтомдорунун бири болуп калат.

Күн мурун Байден АКШнын Украинага жардам берүүдөн ыктымал баш тартуусун “абсолюттук ката” деп атаган. Ал мындай кадам Вашингтондун кызыкчылыктарына каршы келерин белгилеп, анын администрациясы Киевге каражат бөлдүрөөрүн убадалаган.

Ноябрдын ортосунда Жо Байден өкмөттү убактылуу каржылоо тууралуу Конгресс жактырган мыйзамга кол койгон. Ага Ак үй Израиль менен Украинага жардам берүү үчүн сураган каражат кирген эмес.

Буга чейин АКШнын бийлиги Украинага жардам катары бөлүнгөн каражаттын 97% түгөнгөнүн билдирген.

АКШ 3-ноябрда Украинага 425 миллион долларга бааланган аскердик жардамдын кезектеги топтомун жөнөткөнүн маалымдаган. Жалпысынан Украинада согуш башталгандан бери Вашингтон Киевге 44,2 миллиард долларга курал-жарак жана техникалык каражаттарды берди.