396 Бардыгы /

Соңку тапта Кыргызстандын Түштүк айматарында жамгыр нөшөрлөп, көз ачырбай төктү. Өзгөчө кырдаалдар министрлиги Ош облусунда селден улам канча обьект жапа чекендигин эми гана шардана кылып олтурат.

Өзгөчө кырдаалдар министрлигинин ыкчам маалыматына караганда, Ош облусунун Кара-Суу районундагы Мады, Датка жана Баш-Булакта:

• 9 социалдык объект (4 мектеп, 1 бала бакча, 2 оорукана, 1 музей, 1 ФАП);
• 642 турак үйгө суу кирген.

Ал эми Ош шаары боюнча:

• 1 соцобьект (1 бала бакча);
• 146 турак үйгө сел суусу кирген.

Ушул тапта жеринде дагы тактоо жана андан ары сел кесепеттерин жоюу иштери дагыле кызуу улантылууда.

Белгилей кетчү жагдай: күн мурун Ош шаары жана Кара-Суу аймагында катуу жааган жаандын кесепетинен Ак-Буура дарыясындагы суунун деңгээли эбегейсиз көтөрүлүп, борбордук базарын жана дагы эс алуу жайларын тегиз каптаган. Ошондой эле кыян Төлөйкөн айылындагы «Мөл-Булак» эс алуу борборунда бир үй-бүлөнүн мүчөлөрүн — 4 адамды жана дагы бир аялды агызып кеткен. Алардын биринин сөөгү табылды. Мындан тышкары соода күркөлөрүн жана автоунааларды дагы кадимкидей агызган.

Ушул тапта жапа чеккендерди дагыле издөө-куткаруу, ошондой эле селдин кесепеттерин андан ары жоюу-тазалоо иштери күчөтүлгөн режимде улантылууда.

ОРУСИЯДАН КЫЗЫН ТУРМУШКА УЗАТУУ ҮЧҮН КЕЛГЕН КЕЛИНДИ КЫЗДАРЫ МЕНЕН СЕЛ АГЫЗЫП КЕТТИ

Үстүбүздөгү жылдын 14-июлунда көз ачырбай жааган жамгырдын кесепетинен Ош облусунун бир катар аймактарында жүргөн катуу сел беш кишини агызып кетти. Дагы экөөнүн сөөгү табылды. Мындан тышкары ушул тапта үчөө дагыле изделип жатат. Баса, бөөдө кырсык баскандардын төртөө бир үй-бүлөдөн – 44 жаштагы келин жана анын 6, 10, 19 жаштагы кыздары. Дагы бири жергиликтүү тургун.

Баса, кыздары менен кошо сел агызып кеткен 44 жаштагы келин бир топ жылдан бери үй-бүлөсү менен Орусияда миграцияда жүрүп, чоң кызын турмушка узатуу үчүн гана жакында Кыргызстанга келген экен. Бул туурасында маркумду тааныгандар айтышты. Алардын скебине караганда, келиндин төрт баласы бар. Күйөөсү менен кенже уулу аман калып, ал эми аялды үч кызы менен кошо сел жалмап тынды. Анын сөөгү 15-июлда Ак-Буура дарыясынан – Өзбекстанга жакын жерден табылды. Андан бир күн мурун 6 жашар кызынын сөөгү Өзбекстандын Анжиян облусунан, Шахрихансай деген каналдан чыккан эле.

Өзгөчө кырдаалдар министрлиги маркум аялдын жасаты 15-июлда түш ченде калаанын Катта-Терек тилкесинде Ак-Буура дарыясынан табылгандыгын, ал жер Өзбекстандын чек арасына жакын экендигин маалымдады. Ушул тапта маркумдун тек-жайы жана тууган-уруктары такташтырылууда. Буга дейре Ош шаарындагы Төлөйкөн айылындагы эс алуу жайында жүргөн 44 жаштагы аялды 6, 10 жана 19 жаштагы кыздары менен кошо сел агызып кетип, алар изделип жаткан эле. 15-июлга караган түнү ӨКМ буларды кошкондо жалпы беш кишини сел агызып кеткендигин ырастаган.

Алишер ТОКСОНБАЕВ, өз кабарчы