12 Бардыгы /

Башкы прокуратура Ош облусунун Алай районунда көмүр кенине баруу үчүн мыйзамсыз жол салуудан 9 миң куб метрден көп мөңгү талкалангандыгын жана бул фактынын негизинде кылмыш иши козголгондугун билдирди.

        Аталган мекеменин маалыматына караганда, “Кыргызкөмүр” мамлекеттик ишканасынын Түштүк филиалынын кызмат адамдары көмүр кенине барууга жол куруу үчүн уруксат берүүчү документтери жок эле «С» аталышындагы ишкананын өкүлдөрү менен Ош токой чарбасынын Загара-2 участкасында узундугу 6100 метр, туурасы 9 метр болгон жолду мыйзамсыз салышкандыгы аныкталды. Мунун кесепетинен 9 392 куб метр мөңгү талкаланып, жер кыртышы дагы бузулган.

        Башкы прокуратура Кылмыш-Жаза Кодексинин «Кызмат абалынан кыянаттык менен пайдалануу» жана «Иштерди жүргүзүүдө айлана-чөйрөнү коргоо эрежелерин бузуу» беренелеринин негизинде  кылмыш ишин козгоду. Мамлекетке келтирилген зыяндын көлөмү тергөөдө дайындалган тийиштүү экспертизалардын жыйынтыгы менен гана аныкталат.

        Ал эми Жогорку Кеңештин депутаты Жанар Акаев парламенттин быйылкы 10-октябрдагы жыйынында Алай районунун Чоң-Каракол айылында кытайлык делген инвесторлор мөңгүлөрдү талкалап жатышкандыгын жар салып, буларга токтоосуз чара көрүү керектигин какшаган.

Алишер ТОКСОНБАЕВ, өз кабарчы