18 Бардыгы /

Улуттук коопсуздук комитетинин (УКМК) төрагасы Камчыбек Ташиев айыпсыз адамды атайылап, алдын ала уюштуруп, андан ары кылмышка дагы түртүп туруп камаган күч кызматкерлери катуу жазаланарын эскертти. Кыргыз Өкмөтүнүн мүчөсү Баткенге жасаган сапарында жыйынтык үчүн иштөөнү токтотууну талап кылды.

– Бирөөнүн атайлап, артынан түшүп, кылмыш кылдыртып, же болбосо жыйынтык үчүн «Подстава» кылып кармап келсеңер, өзүңөр дагы жооп бересиңер! Андай кылбагыла? Адамдын убалы жаман! Күнөөсүз адамды жоопко тартканды жоюшубуз керек. Жаңылып калууга, ката кетиргенге эч кандай акыбыз жок! Адамдын өмүрү, тагдыры, жашоо-тиричилиги силердин алдыңарда турат. Үй-бүлөсүн, бала-чакасын зарлаткан, кыйналган абалга түшүрбөшүңөр керек. «Подстава» болгондор дароо эле көрүнүп калат. Ал байкуш эптеп эле бир үйдө жашайт, машинасы, ашыкча дүйнөсү деле жок, бирок, аны кылмыш кылган деп камап салган учурлар болот. Ушундайлар болбосун! – деп маселени кабыргасынан койду УКМК төрагасы Камчыбек Ташиев

Бирок, Камчыбек Ташиев буга дейре кимдер ак жеринен, атайын уюштурулган аракеттин негизинде камалганын тактаган жок.

Азыркы бийлик коррупцияга каршы аеосуз күрөш жүрүп жатканын билдирип келе жатат жана пара алууга, коррупцияга шек саналган адамдар, азыркы жана мурдагы мамлекеттик кызматкерлер байма-байма кармалап дагы жатышат. Көп учурда бул кылмыш иштери эмне менен аяктаганы туурасында эч кандай маалымат берилбейт.

Алишер ТОКСОНБАЕВ, өз кабарчы