21 Бардыгы /

Кыргыз Республикасынын Ош шаардык прокуратурасы Ош шаарынын мэриясында мыйзамсыз жок кылынган документтер боюнча териштирүү иштерин кылдат териштирүүгө киришти.

Анткени, ушул жылдын 8-январь күнү социалдык тармактарда Ош шаардык мэриясынын архивиндеги жарандардын жеке маалыматтары таштандыдан табылгандыгы туурасында маалыматтар тараган. Анда Ош шаарынын мэриясынын коммуналдык чарба башкармалыгынын бузулган имаратынын урандыларынын арасынан расмий иш кагаздар жана жарандардын персоналдык маалыматтарын камтыган документтер дагы табылгандыгы жазылган.

Башкы прокуратурадан маалымдашканай, үстүбүздөгү жылдын 8-январь күнү Ош шаардык прокуратурасы архив кызматынын Ош региондук башкармалыгына тийиштүү чараларды көрүү боюнча кат жөнөтүп, анын жыйынтыгы аркасында ушул жылдын 9-январында Ош шаарынын мэриясынын коммуналдык чарба башкармалыгынын жетекчилигине таандык архивдик документтерди мыйзамсыз жок кылуу фактысы боюнча 55 миң сом өлчөмүндө айып пул салынган.

Баса, аталган фактыга түздөн-түз катыштыгы бар Ош шаар мэриясынын жана Ош шаар мэриясына караштуу коммуналдык чарба башкармалыгынын кызматкерлеринин аракеттерине юридикалык баа берүү максатында табылган материалдар тергөөгө чейинки текшерүү ишин жүргүзүү үчүн Ош шаардык ички иштер башкармалыгынын (ШИИБнын) Тергөө кызматына тапшырылды.

Алишер ТОКСОНБАЕВ, өз кабарчы