9 Бардыгы /

Чаткалдагы Ч. Айтматов атындагы райондук маданият үйүндө, райондун эмгек, социалдык камсыздоо жана миграция башкармалыгы, Т. Эрматов атындагы райондук балдар жана өспүрүмдөр спорт мектеби, райондук финансы кредиттик фонду жана Чаткал аймактык шайлоо комиссиясы тарабынан уюштурулган “Ыр кесе” аттуу маданий оюн-зоок кечеси өзүнүн мазмуну жана көркөмдүүлүгү менен көптөгөн катышуучулардын жүрөгүн козгоду.

КР. Президенти С. Жапаровдун “2022-2027-жылдарга улуттук наркты сактоо жана өнүктүрүү жөнүндө улуттук программаны бекитүү ” тууралуу Жарлыгын ишке ашыруунун алкагында өткөрүлгөн бул маданий иш-чарага райондун ар кандай тармактарында эмгектенген мекеме өкүлдөрү, кызматкерлер жана жергиликтүү тургундар катышып, жүрөктү ээлеген ырлар менен бөлүшүп, улуттук каада-салттарды чагылдырган оюндарды уюштурушуп, иш-чаранын кызыктуу жана маанилүү бөлүгү болуп калышты.

Жергиликтүү таланттар, өз кезегинде, өздөрүнүн ырга болгон таланттарын көрсөтүп, көңүл ачуучу оюндар менен көрүүчүлөрдүн кызуу кол чабуусун жарата алышты.”Ыр кесе” кечеси көптөгөн таланттарды ачып, коомдогу ынтымакты бекемдөөгө өбөлгө түздү.

Эмгек, социалдык камсыздоо, спорт, каржы жана шайлоо сыяктуу ар түрдүү тармактардан келген мекеме өкүлдөрү ыр менен гана эмес, ошондой эле көңүл ачуучу оюн-зооктор менен катышып, ар бирине жаңы тажрыйба жана чыгармачылык эргүүлөрдү жаратууга мүмкүнчүлүк түзүлдү.

Соңунда, райондук мамлекеттик администрациясынын башчысы-акиминин орун басары Анара Орозказиеванын куттуктоосунан соң, “Ыр кесе” көңүл ачуучу оюн-зоок кечесин өткөрүү кезеги РИИБ жана райондук өзгөчө кырдаалдар бөлүмүнө салтанаттуу тапшырылды.

“Ыр кесе” маданий оюн-зоок кечеси өз максатына жетип, район тургундарын бириктирип, жакшы маанай, жаңы тааныштар жана жаңы ойлор менен толтуруп, үзгүлтүксүз ийгиликтерге жетелөө үчүн жакшы иш-аракеттерди баштагандай болду.