6 Бардыгы /

8-апрель күнү Токтогул шаарында кыз-келиндер арасында волейбол оюну боюна спорттук мелдеш өткөрүлдү. Бул тууралуу Токтогул шаардык мэриясынан маалымдалды.

Спорттук мелдеш Кыргыз Республикасынын Президентинин 2021-жылдын 29-январындагы “Инсандын руханий – адеп – ахлактык өнүгүүсү жана дене тарбиясы жөнүндө” № 1 Жарлыгынын алкагында Токтогул шаарынын жана ага караштуу айыл амактардагы кыз келиндердин өздүк өнүгүүсүнө өбөлгө түзүү, бош убактысын, күчтүү энергиясын спортко жана коомдук иштерге активдүү катышууга чакыруу, дени сак сергек жашоого үндөө максатында Токтогул шаардык мэриясы тарабынан уюштурулуп, ачылыш аземине Токтогул шаарынын вице мэри Дарманова Тахмина Шаршанбековна, Токтогул шаарынын аялдар кеңешинин төрайымы Түлөкеева Асылбү Таштемировна катышып уюнчуларга ийгиликтерди каалап өтүштү.

Турнирге шаар аймагындагы билим берүү бөлүмдөрүнөн, айыл аймактардан жалпы 13 курама команда катышып, көрүүчүлөр бүйүр кызыткан оюндарга, жогорку дэңгээлдеги аттаандаштыкта өткөн оюндарга күбө болушту.

Иргелип отуруп байгелүү орундарга Токтогул, Бөкөнбаев, Умаров орто мектептеринин жана Кызыл-Туу айылдарынан куралган командалар ат салышып жыйынтыгында:

1-орун Токтогул мектеби

2-орун Умаров мектеби

3-орун Бөкөнбаев мектеби

4-орун Кызыл-Туу айылы камсыз кылышып, Токтогул шаардык мэриясы тарабынан акчалай байгелерге, Кубок жана ардак грамоталарга ээ болушту.

Ошондой эле “Эң улуу спортчу айым”, “Эң мыкты чабуулчу”, “Эң мыкты коргоочу”, “Эң мыкты оюнчу” наамдар оюнчулар арасында аныкталып Токтогул шаардык мэриясы тарабынан ардак грамоталар, акчалай сыйлыктар берилди.

Сыйлоо аземинде Токтогул шаарынын мэринин орун басары Тахмина Дарманова оюнда демөөрчүлүк кылган ишкер Султан Нуркулов мырзага, чеберчилик менен оюн көрсөтүп, кызыктуу оюн куруп берген командаларга ыраазычылык билдирип, аткаруу бийлиги тарабынан алдыда дагы да Токтогул шаарынын айымдары үчүн ыңгайлуу шарттарды, спорттук мелдештерди, жагымдуу климатты түзүүгө иштер токтоосуз улантыла берерин убадаларды.