15 Бардыгы /

Кыргыз Республикасынын УКМКсына караштуу Мамлекеттик Чек ара кызматынын маалымат жана коммуникация башкармалыгы үстүбүздөгү жылдын 8-апрелинде “Достук-автожол” көзөмөл-өткөрүү бекетинин чек арачылары Кыргыз-Өзбек мамлекеттик чек арасы аркылуу ири партиядагы аквариумдук таш бакаларды алып өтүүгө аракет кылган жаранды кармашкандыгын маалымдады.

Маалыматка караганда, стандарттуу паспорттук көзөмөл процедурасы учурунда Кыргыз чек арачылары Кыргызстандан Өзбекстанга бараткан жарандын шектүү жүрүм-турумун байкап калышты. Атайын текшерүү маалында 1991-жылы туулган С.М., аттуу Кыргыз жараны рюкзагына  полиэтилен баштыкка тирүүлөй 100 аквариумдук таш баканы салып алып өтүүгө аракет кылгандыгы аныкталды. Кармалган жаран таш бакаларды бейтааныш адамдын өтүнүчү менен чек арадан алып өтүүгө убадалагандыгын жашырган жок. Тыкыр текшерүү маалында бул жаранда жаныбарларды  чек арадан алып өтүүгө уруксат берүүчү документтери таптакыр жок экендиги аныкталды.

Ошентип, кармалган жаран жана конфискацияланган таш бакалар андан аркы териштирүүлөрдүн калыс жүргүзүлүшү үчүн  жана Кыргыз Республикасынын мыйзам чегинде катаал чара көрүлүшү үчүн тийиштүү компетенттүү укук коргоо органдарынын кызматкерлерине өткөрүлүп берилди.  

Алишер ТОКСОНБАЕВ, өз кабарчы