1,979 Бардыгы /

ЖАЛАЛ-АБАД. 29-мартта Жалал-Абад шаарында «Биз кургак учукка каршыбыз»  деген аталышта жөө жүрүш болду.

Жөө жүрүшкө жалпы медициналык колледждердин студенттери, “Кызыл Ай” коомунун ыктыярчылары  катышты. Алар Ленин жана Кыргыз Республикасы  көчөлөрүнүн кесилишинен аянтка чейин келишти.

Студенттер кургак учукка каршы экендигин жана жөө жүрүштө башкаларга дагы жеткиликтүү маалымат берерин билдиришти.

“Кургак учукту жуктуруп албоо үчүн тазалыкты сактап, башкалардын идиш-аяктарын, буюмдарын колдонбошубуз керек. Оорунун дагы ачык, жабык түрү бар. Коомдук жайларда жана транспортто этият болушубуз керек. Себеби ачык түрүнөн жуктуруп алышыбыз мүмкүн. Бирок коомдо оорулуу адамдарды бөлүп жарууга болбойт. Кургак учук боюнча көп адамдарда маалымат жоктугуна байланыштуу кандай жолдор менен жугарын да билишпейт”-дейт Карлыгач Алмазбек кызы, студент

“Жалал-Абад шаары боюнча курак учукту эртерээк табуу боюнча иш чараларды иштеп чыкканбыз. Үй-бүлөлүк дарыгерлер менен оорунун алдын алуу боюнча көп иштер жасалды. Айта кетсек, статистика боюнча 2018-жылы болгону 66 оорулуу табылды, а 2017-жылы бул көрсөткүч 89 болчу. Азыркы эки айда 13 оору, былтыр 5 оору табылган. Кургак учук бул кээде көбөйүп, кээде азайып турат. Канчалык эрте тапсак ошончолук тез айыгат”-дейт Акылбек Жакшыбаев, Жалал-Абад шаарындагы кургак учукка каршы күрөшүү бөлүмүнүн башчысы

Ал эми иш чара Эркиндик аянтында концерттик программа менен уланып, студенттер флешмоб тартуулашты.

Эске сала кетсек, Жалал-Абад шаарында 24-февралдан 24-мартка чейин кургак учукка каршы күрөшүүнүн бир айлыгы жарыяланган.  Анын алкагында ооруга каршы иш чаралар болуп келген.

Акылай КАРАБАЕВА, “Аймак”