3,358 Бардыгы /

Жалал-Абадда “Толеранттуулук жана демократия элчилери” долбоорунун алкагында “Мен болбосом, анда ким?!”деген аталыштагы мотивациялык семинар өттү.

Иш-чарага жеке ишкер Аскар Салымбеков, Маданият маалымат жана туризм министринин орун басары Нуржигит Кадырбеков жана “Дос курулуш” компаниясынын директору Түгөлбай Сейдалиевдер катышты.

“Телевизордон сүйлөгөн башка интернеттен көргөн башка. Көзгө көз чагылышып, тизеге тизе тийишип, жүрөктүн соккону угулуп турса бул өтө жакшы нерсе.  Адамдын жүзүндө мээр бар. Бул телевизордон же түз эфирден кыла турган нерсе эмес. Жаштар менен баарлашалы, сүйлөшөлү. Аларда талап бар суусап турат. Эгерде талап болгондо багыт берип калбасак жаштар башка бирөөнүн колуна өтүп кетет. Азыр эми жаштарды талашкандар көп кара дүйнө, бомж дүйнө, башка өлкөлөдүн идеологиялары дегендей. Ошону үчүн жаштарга таалим тарбия берели, анткени бул биздин келечегибиз”-дейт Н.Кадырбеков.

Алар жаштарды туура багытка тарбиялоо,  аң-сезимин өнүктүрүү менен бирге кесиптик жана турмуштук тажрыйбаларын бөлүшүштү.

Бул тууралуу “Толеранттуулук жана демократия элчилери” долбоорунун Жалал-Абаддагы координатору Камчыбек Нарматов төмөндөгүдөй билдирди:

“Эл аралык толеранттуулук үчүн фонду Saferworld уюму менен биргеликте эки жылдан бери көп иш-чараларды өткөрүп келе жатабыз. Долбоордун негизги максаты жаштардын көйгөйлөрүнүн алдын алуу болуп эсептелет. Жаштарды окутуп, тренингдерди өткөрүп келе жатабыз. Ошол биз окуткан жаштар демилге көтөрүп чыгышты. Жаштарда мүмкүнчүлүк азыраак болуп жатат деген көйгөйдү көтөрүп, “мен болбосом, анда ким?!” деген иш-чараны уюштуруп жатышат“-дейт К.Нарматов.

Долбоор маалыматтык кампания Европа Биримдиги тарабынан каржылоого алынып, Saferworld жана “Эл аралык толеранттуулук үчүн” фонду тарабынан ишке ашырылып жатат.

Акылай КАРАБАЕВА, “Аймак”