1,698 Бардыгы /

ОШ. Кара-Суу районуна караштуу Кызыл-Кыштак айылынын эки тургунуна жергиликтүү бийлик жер тилкесин убадалады. Бул жөнүндө Бишкек шаарына чындык издеп жөө жөнөшкөн айымдардын бири Орозкан Токторалиева редакциябызга кабарлады.

– Ушул тапта жер тилкесин алууга керектүү документтерибизди белендеп жатабыз. Буга дейре эки тараптуу сүйлөшүүлөр жүрүп маселени тынччылык жолу менен чечели дегенге биз акырында ынадык. Жерди кайсы аймактан беришет белгисиз. Бирок, жакын арада бөлүшөөрүн гана катуу убадалашты. Ошондуктан, биз соттогу иштерибизди дагы жаптык. Эң башкысы: бардыгы тынччылык жолу менен гана чечилди, – деп кошумчалады Орозкан Токторалиева.

Буга дейре Кара-Суу районуна караштуу Кызыл-Кыштак айылынын эки тургуну Кыргыз Республикасынын Президенти Сооронбай Жээнбековго жолугуу максатында Оштон Бишкек шаарын карай жөө жөнөшкөндүгүн жазган элек. Алар Жалал-Абад облусунун Кочкор-Ата шаарына жетишкенде, Кызыл-Кыштак айылынын активисттери буларды токтотушуп, артына кайтарышкан. Ушундан көп өтпөстөн Айыл Өкмөтү дагы буларга он күн аралыгында жер берүүнү убадалаган.

Алишер ТОКСОНБАЕВ, өз кабарчыбыз